எதிர்க்கட்சிகளை பொறுத்தவரை மத்திய அரசு எந்த திட்டம் கொண்டு வந்தாலும் அதை கண்மூடித்தனமாக எதிர்க்க வேண்டும் , அதுதான் புதிய தொழிலாளர் சட்ட சீர்திருத்தத்திலும் தங்கள் எதிர்ப்பை எதிர்க்கட்சிகள் காண்பிப்பதில் தெரிகிறது.

எல்லா சட்டங்களும் காலத்துக்கு ஏற்ப மாற்றக் கூடியவையே. இப்போது நாம் ஏற்படுத்தும் அரசியல் நிர்ணய சட்டம் கூட 15 ஆண்டுகளுக்குப் பிறகு மாற்றத்திற்கு உண்டாகும். அதற்கும் நாம் தயாராக இருக்க வேண்டும் என்று 1949-இல் அம்பேத்கர் சொன்னார். பிரதமராக பதவியேற்ற ஜவகர்லால் நேரு 1952-லயே சட்ட திருத்தத்தை அறிமுகப்படுத்தினார். காலத்துக்கு ஏற்ப எல்லா சட்டங்களும் மாற்றப்பட வேண்டும் என்பதுதான் சரியான பார்வை. அது புதிய தொழிலாளர் சட்டத்துக்கும் பொருந்தும்.

இந்த சட்ட திருத்தத்தில் ஓராண்டு வேலை செய்தாலே பணிக்கொடை பெறலாம். வேலையில் நியமனம் செய்பவருக்கு எழுத்துப்பூர்வமான ஆணைகள் வழங்கப்பட வேண்டும், பணி நேரத்தை தாண்டி கூடுதல் நேரம் பணியாற்றினால் இரு மடங்கு ஊதியம். 40 வயதுக்கு மேல் அனைத்து ஊழியர்களுக்கும் கட்டாய மருத்துவ பரிசோதனை ஆண்டுதோறும் என்று தொழிலாளர்களுக்கு சாதகமான திட்டங்களும் இதில் இருக்கின்றன. ஆபத்தான பணியில் ஈடுபடும் தொழிலாளர்களுக்கு 100% சுகாதார பாதுகாப்பு வீடுகளுக்கு உணவு உள்ளிட்டவற்றை விநியோகம் செய்யும் தொழிலாளர்களுக்கு அந்த நிறுவன உரிமையாளர்கள் சிறப்பு நல நிதியங்கள் அமைக்க வேண்டும். அவரவர் நிறுவன வருவாயில் 1.2 சதவீதத்தை நல நிதியங்களுக்கு வழங்க வேண்டும் பெண்கள் விரும்பினால் இரவுப் பணிகள் செய்யலாம். அவருக்கான பாதுகாப்பு உறுதிப்பட வேண்டும். ஊதியத்தில் ஆண், பெண் பாரபட்சம் கூடாது சம வாய்ப்பு வழங்க வேண்டும். சம ஊதியம் வழங்க வேண்டும் என்று பல நல்ல திட்டங்கள் இருக்கின்றன. எதிர்க்கட்சிகள் இவற்றை ஆதரித்து விட்டு தொழிலாளர்களுக்கு பாதகமான விஷயங்கள் என்ன என்பதை வெளிப்படையாக சுட்டிக்காட்டி அது உண்மையாக இருக்குமானால் அவற்றையும் இந்த அரசு சரி செய்ய வேண்டும். தேவையற்ற எதிர்ப்பு என்பது கூட மக்களின் நன்மதிப்பை இழப்பதற்கான ஒரு காரண காரியமாகும் என்பதை எதிர்கட்சிகள் தெரிந்து கொள்ள வேண்டும்.