வயநாடு நிலச்சரிவில் உயிரிழந்தவர்களின் குடும்பத்தினருக்கும், காயமடைந்தவர்களுக்கும் வழங்கப்பட வேண்டிய இழப்பீட்டுத் தொகையை உரிய நேரத்தில் வழங்குவதை உறுதி செய்யுமாறு கேரள அரசுக்குக் கேரள உயர் நீதிமன்றம் கடந்த வெள்ளிக்கிழமை உத்தரவிட்டது.

அனக்கம் பொயில்-மேப்பாடி சுரங்கப்பாதை திட்டப் பணிகளை எப்போது நிறுத்தினார்கள் என்பது குறித்த விரிவான அறிக்கையையும் நீதிமன்றம் கோரியது;

அனைத்து கட்டுமானப் பணிகளும் நிறுத்தப்பட்டிருந்த நிலையில், அங்கு தொழிலாளர்கள் ஏன் இருந்தார்கள் என்றும் கேள்வி எழுப்பியது.

[இந்த டேங்கரை நிலச்சரிவு சுமார் 200 அடி வரை பின்னுக்கு தள்ளிவிட்டது]

வயநாட்டின் முண்டக்கை மற்றும் சூரல்மலை கிராமங்களில் 200-க்கும் மேற்பட்ட உயிர்களைப் பலிவாங்கிய பேரழிவுமிக்க நிலச்சரிவுகளைத் தொடர்ந்து, 2024-ல் உயர் நீதிமன்றம் தாமாக முன்வந்து (suo motu) தொடங்கிய வழக்கின் விசாரணையின்போது, ​​நீதிபதிகள் ஏ.கே. ஜெயசங்கரன் நம்பியார் மற்றும் பிரீதா ஏ.கே. ஆகியோர் அடங்கிய அமர்வு இந்த உத்தரவுகளைப் பிறப்பித்தது.

கேரளாவில் இயற்கை பேரிடர்களைத் தடுப்பது மற்றும் நிர்வகிப்பது தொடர்பான நடவடிக்கைகள் குறித்து இந்த வழக்கு விசாரிக்கப்பட்டு வருகிறது. இதற்கிடையில், வெள்ளிக்கிழமையன்று நிலச்சரிவு நடந்த இடத்திலிருந்து மேலும் ஒரு உடல் மீட்கப்பட்டதைத் தொடர்ந்து, இந்தச் சம்பவத்தில் உயிரிழந்தவர்களின் எண்ணிக்கை ஏழாக உயர்ந்தது.

முண்டக்கை மற்றும் சூரல்மலை பகுதிகளைச் சீர்குலைத்த ஜூலை 30, 2024-ன் பேரழிவுமிக்க நிலச்சரிவுகளுக்குப் பிறகு இரண்டு ஆண்டுகள் கூட ஆகாத நிலையில்....

வயநாடு மீண்டும் ஒருமுறை மரணத்தையும் அழிவையும் சந்தித்துள்ளது.

ஜூலை 7, 2026 அன்று, கனமழையின் இடையே மேப்பாடிக்கு அருகிலுள்ள கல்லாடி சுரங்கப்பாதை கட்டுமானப் பகுதியில் ஏற்பட்ட மிகப்பெரிய நிலச்சரிவில் குறைந்தது மூன்று பேர் உயிரிழந்தனர்.

பலர் காணாமல் போயினர்.

இந்தியாவின் மிகவும் உணர்திறன் மிக்க சூழலியல் மண்டலங்களில் ஒன்றான இப்பகுதியில் மேற்கொள்ளப்படும் பெரிய உள்கட்டமைப்புத் திட்டங்களின் பாதுகாப்பு குறித்த கவலைக்குரிய கேள்விகளையும் இது எழுப்பியுள்ளது.

மீட்புக் குழுக்கள் தங்கள் தேடுதல் வேட்டையைத் தொடரும் நிலையில், வயநாடு தீவிர வானிலை மாற்றத்தின் பலியாடா அல்லது மனித முடிவுகளால் இத்தகைய பேரிடர்கள் தூண்டப்படுகின்றனவா என்று நிபுணர்கள், சுற்றுச்சூழல் ஆர்வலர்கள் மற்றும் உள்ளூர் மக்கள் கேள்வி எழுப்புகின்றனர்.

கோழிக்கோடு மற்றும் வயநாடு இடையிலான போக்குவரத்தை மேம்படுத்தும் நோக்கில் மேற்கொள்ளப்பட்ட 'அனக்கம் பொயில்-கல்லாடி-மேப்பாடி' சுரங்கப்பாதை சாலைத் திட்டத்தின் கட்டுமானப் பணிகள் நடைபெற்று வந்த மீனாட்சி பாலத்திற்கு அருகிலேயே இந்தச் சரிவு ஏற்பட்டது.

நிலவியலாளர்கள் மற்றும் சுற்றுச்சூழல் நிபுணர்களால் நிலச்சரிவு அபாயம் அதிகம் உள்ள பகுதியாகத் தொடர்ந்து அடையாளம் காணப்பட்ட ஒரு மண்டலத்தில், ஒரு பெரிய உள்கட்டமைப்புத் திட்டப் பகுதியில் இது நிகழ்ந்ததால், இந்த நிலச்சரிவு வெறும் மழை சார்ந்த பேரிடராக மட்டும் பார்க்கப்படவில்லை.

பல இயற்கையான சரிவுகளைப் போலல்லாமல், இது ஒரு தீவிரமான சுரங்கப்பாதை கட்டுமானப் பகுதிக்கு அருகில் நிகழ்ந்தது. அங்கு விரிவான குன்று வெட்டுதல், அகழ்வாராய்ச்சி, மண் கொட்டுதல் மற்றும் தடுப்புக் கட்டமைப்புகள் ஆகியவை நிலப்பரப்பை மாற்றியமைத்திருந்தன.

இந்தச் சரிவு, சரிவு ஏற்படுவதைத் தடுப்பதற்காகக் கட்டப்பட்ட கான்கிரீட் சுவரையே அழித்தது.

இது, பொறியியல் பாதுகாப்பு ஏற்பாடுகள் மற்றும் புவியியல் மதிப்பீடுகளின் போதுமான தன்மை குறித்து உடனடிக் கேள்விகளை எழுப்பியது.

வயநாடு அதன் செங்குத்தான நிலப்பரப்பு, எளிதில் உடையக்கூடிய செம்மண், ஆழமாக அரிக்கப்பட்ட பாறை அமைப்புகள் மற்றும் தீவிரமான தென்மேற்குப் பருவமழை காரணமாக எப்போதுமே நிலச்சரிவுகளுக்கு ஆளாகக்கூடியதாக இருந்து வருகிறது.

பேரழிவுகளின் அதிகரித்துவரும் அதிர்வெண் மற்றும் தீவிரத்தை இயற்கையான பாதிப்புத்தன்மை மட்டுமே விளக்க முடியாது என்று நிபுணர்கள் வாதிடுகின்றனர்.

பல தசாப்தங்களாக மெப்பாடிப் பகுதியில் நிலச்சரிவுகள் மீண்டும் மீண்டும் ஏற்பட்டுள்ளன என்று வரலாற்றுப் பதிவுகள் குறிப்பிடுகின்றன.

1960-களிலிருந்து இப்பகுதியில் ஏற்பட்ட பெரிய சரிவுகளை அறிக்கைகள் ஆவணப்படுத்துகின்றன.

முதலாவதாக, பருவநிலை மாற்றம் தீவிரமான மழைப்பொழிவு நிகழ்வுகளை அதிகரித்துள்ளது.

பல நாட்களாகச் சீரான பருவமழையைப் பெறுவதற்குப் பதிலாக, வயநாடு இப்போது குறுகிய காலத்தில் பெருமளவிலான மழையைக் கொட்டும் 'மேகவெடிப்பு' (cloudburst) போன்ற நிகழ்வுகளை அதிகம் எதிர்கொள்கிறது.

இத்தகைய தீவிர மழைப்பொழிவு மலைச்சரிவுகளை விரைவாக நீர்நிறைந்ததாக மாற்றி, நிலச்சரிவு அபாயத்தை வெகுவாக அதிகரிக்கிறது.

இரண்டாவதாக, சாலை அமைத்தல், கல் குவாரிப் பணிகள், மலைகளை வெட்டுதல், காடழிப்பு மற்றும் பெரிய உள்கட்டமைப்புத் திட்டங்கள் உள்ளிட்ட மனித நடவடிக்கைகளால்,

ஏற்கனவே பலவீனமாக இருந்த மலைச்சரிவுகள் மேலும் வலுவிழந்துள்ளன. மூன்றாவதாக, விரிவடையும் குடியிருப்புகள் மற்றும் வளர்ச்சிப் பணிகள் அதிக எண்ணிக்கையிலான மக்களை நேரடியாக ஆபத்துக்குள்ளாக்கியுள்ளன.

சமீபத்திய பேரிடருக்கு வெகு காலத்திற்கு முன்பே, ஆனக்கம்பொயில்-கல்லாடி-மேப்பாடி சுரங்கப்பாதை திட்டத்தின் கட்டுமானப் பணியில் பின்பற்றப்பட்ட பொறியியல் அணுகுமுறை குறித்து நிபுணர்கள் கவலை தெரிவித்திருந்தனர்.

இந்தியப் புவியியல் ஆய்வு மையம் (GSI) மற்றும் பொறியியல் ஆலோசகர்கள் அடங்கிய கூட்டுக்குழுவின் தொடர் ஆய்வுகளுக்குப் பிறகு தயாரிக்கப்பட்ட அறிக்கைகளின்படி, சுரங்கப்பாதையின் நுழைவாயிலை உறுதிப்படுத்தப் பயன்படுத்தப்பட்ட 'ஷாட்கிரீட்' (shotcrete) வடிவமைப்பு, கேரளாவின் தொடர்ந்து ஈரப்பதமான மலைப்பகுதிச் சூழலுக்குப் பொருத்தமற்றதாகக் கருதப்பட்டது.

பொதுப்பணித்துறையின் (PWD) தலைமைப் பொறியாளர்கள் மற்றும் வயநாடு மாவட்ட ஆட்சியர் ஆகியோர் ஜூன் 12, 2026 அன்று இணையவழியில் ஆய்வுக் கூட்டம் ஒன்றை நடத்தினர்.

கட்டுமானப் பகுதிக்கு அருகில் தோண்டி எடுக்கப்பட்ட மண் பெருமளவில் குவித்து வைக்கப்பட்டிருந்தது அப்போது கவனிக்கப்பட்டது.

இத்திட்டத்தைச் செயல்படுத்திய கொங்கன் ரயில்வே கார்ப்பரேஷன் லிமிடெட் (KRCL) நிறுவனத்திற்குப் பின்வரும் அறிவுறுத்தல்கள் வழங்கப்பட்டன: மழைக்காலங்களில் எந்தப் பணியும் மேற்கொள்ளப்படக்கூடாது; ஆபத்தான வானிலை நிலவும்போது தொழிலாளர்களைப் பணியில் ஈடுபடுத்தக்கூடாது;

மற்றும் குவிந்துள்ள மண்ணை அகற்ற வேண்டும். இதைத் தொடர்ந்து ஜூலை 1, 2026 அன்று மற்றொரு ஆய்வுக் கூட்டம் நடைபெற்றது.

இப்பிரச்சினைகள் குறித்துத் தொடர்ந்து அளிக்கப்பட்ட புகார்களுக்குப் பதில் கிடைக்கவில்லை என்று சில உள்ளூர்வாசிகள் கூறுகின்றனர்.

கட்டுமான நிறுவனம் தங்கள் மீதான அலட்சியம் குறித்த குற்றச்சாட்டுகளை மறுத்துள்ளது. அனைத்துப் பணிகளும் நிர்ணயிக்கப்பட்ட பாதுகாப்பு விதிமுறைகள் மற்றும் சுற்றுச்சூழல் நிபந்தனைகளுக்கு உட்பட்டே மேற்கொள்ளப்பட்டதாகவும், பொறியியல் குறைபாடுகளால் அல்லாமல், வழக்கத்திற்கு மாறான மிக அதிக அளவிலான மழைப்பொழிவே இந்தப் பேரிடருக்குக் காரணம் என்றும் அந்நிறுவனம் கூறுகிறது.

தோண்டி எடுக்கப்பட்ட மண் அங்கீகரிக்கப்பட்ட தரநிலைகளின்படியே கையாளப்பட்டதாகவும், உச்ச நீதிமன்றத்தின் உத்தரவின் பேரில் அமைக்கப்பட்ட அமைப்புகளின் கண்காணிப்பு உட்படப் பல அடுக்கு ஒழுங்குமுறை மேற்பார்வைக்கு இத்திட்டம் உட்படுத்தப்பட்டிருந்ததாகவும் நிறுவனம் தெரிவித்துள்ளது.

GSI அறிக்கைகளின்படி, சுரங்கப்பாதை மலைப்பகுதிக்குள் நுழையும் இடமான 'போர்ட்டல்' (portal) பகுதிக்கு அருகில் விரிசல்கள் ஏற்பட்டிருந்தன. சரிவு ஏற்படுவதற்கு ஒரு மாதத்திற்கு முன்புதான் இந்த ஆய்வு நடைபெற்றதாகக் கூறப்படுகிறத.

உடனடி சீரமைப்பு நடவடிக்கைகள் மேற்கொள்ளப்படாவிட்டால், இந்த உறுதியற்ற தன்மை ஒரு பெரும் பேரழிவாக உருவெடுக்கக்கூடும் என்று நிபுணர்கள் எச்சரித்தனர்.

ஜூன் 14 தேதியிட்ட அந்த அறிக்கை, பருவமழைக் காலத்தில் பணிகளை நிறுத்திவைக்கவும், சரிவு நிலைப்படுத்தல் அமைப்பை மறுவடிவமைக்கவும், அகழ்வாராய்ச்சி தளத்தைச் சுற்றி மழைநீர் தேங்காதவாறு முறையான வடிகால் அமைப்பை உறுதி செய்யவும் பரிந்துரைத்ததாகத் தெரிகிறது. மேலும், கூடுதல் ஷாட்கிரீட் மூலம் விரிசல் விட்ட பகுதிகளை வலுப்படுத்தவும், மேற்கொண்டு பணிகளைத் தொடர்வதற்கு முன்பு புவித்தொழில்நுட்ப வல்லுநர்களுடன் கலந்தாலோசிக்கவும் அது பரிந்துரைத்தது.

2024-ல் ஏற்பட்ட நிலச்சரிவுகளைத் தொடர்ந்து, சுரங்கப்பாதை திட்டத்திற்கான இரண்டாம் கட்ட சுற்றுச்சூழல் அனுமதியை வழங்குவதற்கு முன், மத்திய சுற்றுச்சூழல், வனம் மற்றும் காலநிலை மாற்ற அமைச்சகம் கூடுதல் விளக்கங்களைக் கோரியதாகத் தகவல்கள் தெரிவிக்கின்றன.

மேற்குத் தொடர்ச்சி மலைகளின் சூழலியல் நிபுணர் குழுவிற்குத் தலைமை தாங்கிய மறைந்த சூழலியலாளர் மாதவ் காட்கில், இப்பகுதியில் ஏற்படும் பேரிடர்களை வெறும் இயற்கைச் சீற்றங்களாக மட்டும் பார்க்க முடியாது என்று தொடர்ந்து வலியுறுத்தி வந்தார்.

2011-ல் அவர் சமர்ப்பித்த முக்கியத்துவம் வாய்ந்த அறிக்கை, கட்டுப்பாடற்ற கல் குவாரி மற்றும் சுரங்கப் பணிகள், பெரிய உள்கட்டமைப்புத் திட்டங்கள், சாலை விரிவாக்கம், காடழிப்பு மற்றும் கண்மூடித்தனமான கட்டுமானப் பணிகள் ஆகியவற்றால் இம்மலைத்தொடர் ஏற்கனவே கடுமையான சூழலியல் அழுத்தத்திற்கு உள்ளாகியிருப்பதாகச் சுட்டிக்காட்டியது.

இருப்பினும், ஜூலை 2026-ல் ஏற்பட்ட நிலச்சரிவுக்கு இந்தச் சுரங்கப்பாதை திட்டமே நேரடிக் காரணம் என்று எந்தவொரு அதிகாரப்பூர்வ விசாரணையும் இதுவரை உறுதிப்படுத்தவில்லை என்பதையும் கவனத்தில் கொள்வது அவசியம்.

இன்று, காலநிலை மாற்றத்தின் விளைவாகக் குறுகிய காலமே நீடிக்கும்,

ஆனால் மிகத் தீவிரமான மழைப்பொழிவு ஏற்படுகிறது.

இத்தகைய தீவிர மழைப்பொழிவு நிகழ்வுகள் மலைச்சரிவுகளை விரைவாக நீர்நிறைந்ததாக மாற்றுகின்றன; மண்ணுக்குள் நீரின் அழுத்தத்தை (pore-water pressure) அதிகரிக்கின்றன மற்றும் சிதைவடைந்த பாறை அமைப்புகளின் வலிமையைக் குறைக்கின்றன. இதனால் மலைச்சரிவுகள் இடிந்து விழும் அபாயம் வெகுவாக அதிகரிக்கிறது. சாலை அமைத்தல், சுரங்கப்பாதை தோண்டுதல், மலைப்பகுதியை வெட்டுதல், கல் குவாரி அல்லது காடழிப்பு போன்ற மனித நடவடிக்கைகளுடன், காலநிலை மாற்றத்தால் ஏற்படும் தீவிர மழையும் இணையும்போது, ​​ஆபத்து இன்னும் அதிகமாகிறது.

இந்தியாவின் பிற பகுதிகளில் உள்ள ஒப்பீட்டளவில் நிலையான மலை அமைப்புகளுக்காக வடிவமைக்கப்பட்ட பொறியியல் தீர்வுகள், கேரளாவின் தனித்துவமான சூழலுக்கு - அதாவது அதிக மழைப்பொழிவு, ஆழமாகச் சிதைவடைந்த மண் மற்றும் செங்குத்தான நிலப்பரப்பு ஆகியவற்றின் கலவைக்கு - எப்போதும் பொருத்தமானதாக இருக்காது என்று சுற்றுச்சூழல் நிபுணர்கள் வாதிடுகின்றனர்.

அறிவியல் தரநிலைகள் மற்றும் சுற்றுச்சூழல் சூழலுக்கு ஏற்பத் திட்டங்கள் செயல்படுத்தப்பட்டால், நவீன பொறியியல் தொழில்நுட்பம் மூலம் இத்தகைய சவால்களைப் பாதுகாப்பாகக் கடக்க முடியும் என்று சுரங்கப்பாதை திட்டத்தை ஆதரிப்பவர்கள் கூறுகின்றனர்.

இங்குள்ள சவால் வளர்ச்சிக்கும் இயற்கை பாதுகாப்புக்கும் இடையே ஒன்றைத் தேர்ந்தெடுப்பது அல்ல; மாறாக, வளர்ச்சி என்பது தான் சார்ந்திருக்கும் நிலப்பரப்பையே சிதைத்துவிடாதவாறு உறுதி செய்வதே ஆகும்.

இயற்கையை பாழ்படுத்தினால் அது திருப்பித் தாக்கும் போது நாம் தாங்க முடியாது என்பதை மீண்டும் ஒருமுறை வயநாடு சம்பவம் நமக்கு எச்சரிக்கை விடுத்துள்ளது.