நவகிரகங்களின் ஆட்சியின் ஆளுகைக்கு உட்பட்டுத்தான் மனிதனுடைய ஒவ்வொரு செயலும் நடைபெற்று வருகிறது. அவை சூரியன், சந்திரன், செவ்வாய், புதன், குரு, சுக்கிரன், சனி, இராகு மற்றும் கேது என ஒன்பது கிரகங்கள். இவர்கள் நவகிரக நாயகர்கள் என அழைக்கப்படுகிறார்கள். இந்த ஒவ்வொரு கிரகத்திற்கும் அபார சக்தியும் தனிப்பட்ட பலனும் உள்ளது. சிவபெருமான் இந்த பிரபஞ்சத்தைத் தோற்றுவித்து, அதில் உயிர்களைப் படைக்க நான்முகக் கடவுளான பிரம்மாவையும், படைத்த உயிர்களைக் காக்கப் பகவான் மகாவிஷ்ணுவையும் அவதரிக்கச் செய்தார். ஆனால், படைத்தல், காத்தல் மற்றும் அழித்தல் தொழிலை மேற்கொண்ட பிரம்மா, விஷ்ணு மற்றும் சிவபெருமானால் இந்த உலகில் படைக்கப்பட்ட உயிரினங்கள் யாவும் முக்தி என்னும் பிறவா நிலையை அடைய முடியவில்லை. ஒரு உயிரினம் பிறவா நிலையை அடைய வேண்டுமாயின். தனது கர்ம வினைகளை முழுமையாக அனுபவிக்க வேண்டும். இவ்வாறு ஒரு உயிரினம் தனது கர்ம வினைகளைச் சரிவர (பாவங்கள் மற்றும் புண்ணியங்கள்) அனுபவித்து முக்தி பெறச் சிவபெருமானிடமிருந்து உருவாக்கப்பட்ட நாயகர்களே 'நவகிரக நாயகர்கள்’ இவர்கள் சிவபெருமானுக்கு மட்டுமே கட்டுப்பட்டவர்கள். நவகிரக நாயகர்கள் அனைவரும் ஒரே காலகட்டத்தில் உருவானவர்கள் அல்ல. பல ரிஷிகள் மற்றும் முனிவர்களுக்கு மகன்களாகப் பிறந்து, அவர்களின் வழிகாட்டலின் படியும், தவ வலிமையாலும் நவகிரக மண்டலத்தில் இணைந்து நவகிரக நாயகர்கள் ஆனார்கள்.

இந்துக்களின் வழிபாட்டில் நவக்கிரகங்கள் என்று அழைக்கப்படும் சூரியன்(ஆத்மகாரகன்), சந்திரன் (மனோகாரகன்), செவ்வாய் (பூமிகாரகன்), புதன்(புத்திகாரன்), வியாழன்(குரு) வெள்ளி(சுக்கிரன்), சனி(மந்தாகரன்), ராகு (யோகக்காரகன்), கேது(ஞானகாரகன்) ஆகிய ஒன்பது கிரகங்களும் முக்கிய இடத்தை பெற்றுள்ளன. இந்த ஒன்பது கிரகங்கள் தமிழில் கதிரவன், சோமன், நிலமகன், அறிவன், சீலன், கங்கன், காரி, கருநாகன், செந்நாகன் என்று வழங்கப்படுகின்றன. இவை மனித வாழ்க்கையின் போக்கினை நிர்ணயிக்கின்ற ஆற்றல் கொண்டவை என்பது காலம் காலமாக இந்துக்களிடம் இருந்து வரும் நம்பிக்கையாகும். சூரியன் ஆத்மாவையும், சந்திரன் மனதையும், செவ்வாய் பலத்தையும், புதன் வாக்கு வன்மையையும், வியாழன் அறிவையும் சுக்கிரன் காம இச்சை மற்றும் இந்திரியங்களையும், சனி கடின உழைப்பு மற்றும் கடமையையும், ராகு மற்றும் கேது நிழல் கிரகங்களாகச் செயல்படுகிறது. ஒவ்வொருவரின் உடலையும் மனதையும் இந்த நவக்கிரகங்களே இயக்கிக் கொண்டிருக்கின்றன என்று கருதப்படுகிறது. இந்த ஒன்பது கிரகங்களும் பூமியில் வாழும் அனைத்து உயிர்களுடன் நெருங்கிய தொடர்பு கொண்டவை.
இவைகளை நாம் நவகிரகங்கள் அல்லது நவ கோள்கள் என்று கூறுகிறோம் (நவ என்றால் ஒன்பது என்று பொருள்).

இந்த நவகிரகங்கள் மனித வாழ்வில் உறவுகளாக நம்மைச் சூழ்ந்துள்ளனர். நவகிரகங்களில் முதலாவதாக உள்ள சூரியன் தந்தை ஆவார். நவகிரகங்களில் இரண்டாவதாக உள்ள சந்திரன் தாய் ஆவார். சகோதர, சகோதரிகள் மற்றும் கணவனாக, நவகிரகங்களில் மூன்றாவதாக உள்ள செவ்வாய் உள்ளார். நவகிரகங்களில் நான்காவதாக உள்ள புதன் மாமன், மைத்துனர்கள் ஆவர். நவகிரகங்களில் ஐந்தாவதாக உள்ள குரு புத்திரர்கள் ஆவார். நவகிரகங்களில் ஆறாவதாக உள்ள சுக்கிரன் மனைவி மற்றும் நண்பர்களாக நம்மைச் சூழ்ந்துள்ளனர். நவகிரகங்களில் ஏழாவதாக உள்ள சனி, பணியாட்களாக இருக்கின்றனர். நவகிரகங்களில் எட்டாவதாக இருக்கின்ற ராகு, தந்தை வழியாகவும், கேது தாய் வழியாக நம்மைச் சூழ்ந்துள்ளனர்.
கிரகங்கள் விண்ணில் இருந்து தனக்கென குறிப்பிடப்பட்டுள்ள பாதையில் குறிப்பிட்ட காலம் வரை தவறாமல் சஞ்சரிக்கின்றன. இவற்றின் சஞ்சாரத்தால் சீதோஷ்ண நிலையில் மாறுதல்கள் ஏற்படுகின்றன. இந்த சீதோஷ்ண மாறுதல்களினால் பருவ நிலை மாற்றங்களும் உண்டாகின்றன.
நாம் வணங்கும் நவகிரக நாயகர்கள் ஒவ்வொருவருக்கும் தனித்தனி அதிதேவதைகள் உண்டு, அவர்களின் வழிபாடு நமக்கு நன்மைகளைத் தரும் என நம்பப்படுகிறது.

கிரகம் 1: சூரியன் (ஞாயிறு)
நவகிரகங்களில் முதன்மையானது சூரியன். கிழக்குத் திசை சூரியனுக்கு உரியது. இது ஒளி மற்றும் ஆற்றலைக் குறிக்கிறது. அக்னி இவருக்கு அதி தேவதை.

கிரகம் 2: சந்திரன் (திங்கள்)
நவகிரகங்களில் இரண்டாவது சந்திரன். தென் கிழக்குத் திசை சந்திரனுக்குரியது. மனம், உணர்வுகள் மற்றும் அமைதியைக் குறிக்கிறது. பார்வதி தேவி இக்கிரகத்தின் அதி தேவதை ஆவார்.

கிரகம் 3: அங்காரகன் (செவ்வாய்)
நவகிரகங்களில் மூன்றாவது கிரகம் செவ்வாய். தெற்கு திசை செவ்வாய்க் கிரகத்திற்கு உரியது. தைரியம், ஆற்றல் மற்றும் போர் ஆகியவற்றைக் குறிக்கிறது. பூமாதேவி இக்கிரகத்தின் அதி தேவதை ஆவார்.

கிரகம் 4 : புதன்
நவகிரகங்களில் நான்காம் கிரகம் புதன். வட கிழக்கு திசை புதனுக்கு உரியத் திசை. புத்திசாலித்தனம், வணிகம் மற்றும் தகவல் தொடர்புகளைக் குறிக்கிறது. விஷ்ணு இக்கிரகத்தின் அதி தேவதை ஆவார்.

கிரகம் 5 : குரு (வியாழன்)
நவகிரகங்களில் ஐந்தாம் கிரகம் குரு. வடக்கு திசை குருவின் திசை. செல்வம் மற்றும் மங்களகரமான நிகழ்வுகளின் காரணியாகக் கருதப்படுகிறார். பிரம்மா இக்கிரகத்தின் அதி தேவதை ஆவார்.

கிரகம் 6: சுக்கிரன் (வெள்ளி)
நவகிரகங்களில் ஆறாவது கிரகம் சுக்கிரன். கிழக்குத் திசை சுக்கிரனுக்கு உரியத் திசையாகும். இன்பம், ஆடம்பரம் மற்றும் செல்வத்தின் காரணியாகக் கருதப்படுகிறார். இந்திராணி இக்கிரகத்தின் அதி தேவதை ஆவார்.

கிரகம் 7: சனி
நவகிரகங்களில் ஏழாம் கிரகம் சனி. மேற்கு திசை சனி கிரகத்திற்கு உரியது. கடின உழைப்பு மற்றும் நீதியின் காரணியாகக் கருதப்படுகிறார். யமன் இக்கிரகத்தின் அதி தேவதை ஆவார்.

கிரகம் 8: ராகு
நவகிரகங்களில் எட்டாவது கிரகம் ராகு. தென்மேற்கு திசை ராகுவுக்கு உரியது. நிழல் கிரகம் என்றும் அழைக்கப்படுகிறது. சில நேரங்களில் எதிர்மறை விளைவுகளைத் தரக்கூடியது. பசு இக்கிரகத்தின் அதி தேவதை.

கிரகம் 9 : கேது
நவகிரகங்களில் ஒன்பதாம் கிரகம் கேது. வடமேற்கு திசை சந்திரனுக்குரியது. இதுவும் நிழல் கிரகம் என்றும் அழைக்கப்படுகிறது. மறைக்கப்பட்ட ஞானத்தையும், ஆன்மீக நாட்டத்தையும் குறிக்கிறது. சித்திரகுப்தன் இக்கிரகத்தின் அதி தேவதை ஆவார்.
ஒருவருக்கு, ஒன்பது கிரகங்களில் ஏதேனும் ஒன்றின் பாதிப்பு ஏற்பட்டாலும், அந்த கிரகங்களுக்குரிய பலன்கள் முழுமையாகக் கிடைக்காமல் போய் விடும் என்ற நம்பிக்கை காலம் காலமாக இருந்து வருகிறது. நவகிரகங்களினால் நமக்கு ஏற்படவிருக்கின்ற நன்மையான பலன்களை அதிகரித்து, தீமையான பலன்களைக் குறைக்கத் திருஞான சம்பந்தர் இயற்றிய கீழ்க்கண்ட “கோளறு திருப்பதிகத்தினை சொல்பவர் அனைவருக்கும் ஒன்பது கிரகங்களும் குறைவற்ற நன்மையையே புரியும் என்று கட்டியம் கூறுகிறார்.

வேயுறு தோளிபங்கன் விடமுண்ட கண்டன்
மிகநல்ல வீணை தடவி
மாசறு திங்கள் கங்கை முடிமேலணிந்தென்
உளமே புகுந்த அதனால்
ஞாயிறு திங்கள்செவ்வாய் புதன்வியாழம் வெள்ளி
சனிபாம்பி ரண்டு முடனே
ஆசறு நல்லநல்ல அவைநல்ல நல்ல
அடியா ரவர்க்கு மிகவே. - திருஞான சம்பந்தர்

மீண்டும் அடுத்த வாரம் நலம் தரும் நவகிரக நாயகர்களுடன் தொடர்வோம்….