சுற்றுசூழல் குறித்து நாம் கடைபிடிக்க வேண்டிய 9 விஷயங்களை உங்களுக்காக தருகிறேன். இந்த விஷயங்களை கடைபிடித்தால் அது கட்டாயம் சுற்றுசூழலுக்கான நம் பங்களிப்பாக இருக்கும் என்பதில் ஐயமில்லை.

மரக்கன்றுகளை நடுங்கள்:

நீங்கள் வசிக்கும் தெருவில் அல்லது அந்த பகுதியில், உள்ளூர் வகையைச்சார்ந்த இரண்டு நிழல் தரும் கன்றுகளை நடுங்கள். நட்ட கன்றுகளுக்கு குறைந்தது இரு வருடங்களுக்காவது தவறாமல் தண்ணீர் விட வேண்டும். மரம் வளர்ந்த பின் அந்த பகுதியின் மாசு அனைத்தையும் இந்த மரங்கள் தடுத்தாட்கொண்டு பிராணவாயுவை வெளிப்படுத்தும். உங்கள் வீட்டை சுற்றி மரங்கள் இருந்தால் கோடை காலத்தில் உங்கள் வீட்டில் குளிரூட்டியின் பயன்பாட்டை குறைக்கலாம்.

தண்ணீரை சேமியுங்கள்:

அடுத்த முக்கியமான ஒரு இயற்கையின் கொடை நாம் தினமும் பயன்படுத்தும் குடிநீர். நம்மில் பலர் பல் துலக்கும்போதும் , ஆண்களாக இருந்தால் சவரம் செய்துகொள்ளும் போதும் நீரை வீணடிப்பதில் நமக்கு நிகர் நாமே. எவ்வளவுக்கு எவ்வளவு நீரை சேமிக்கிறோமோ அது நாம் இயற்கைக்கு செய்யும் ஒரு பேருதவியாகும். அதே போல சவ்வூடு பரவல் (RO) மூலம் சுத்திகரிக்கப்பட்ட நீரை உபயோகிக்கும்பொழுது அதனால் வெளியாகும் நீரை வீணாக்காமல் சேமிப்பதும் ஒரு நல்ல விஷயம்தான்.

மின்சாரம்:

பொதுவாகவே நாம் ஒரு அறையை விட்டு வெளியே செல்லும்பொழுது அங்குள்ள இயங்கிக்கொண்டிருக்கும் மின் விசிரியயோ அல்லது விளக்குகளையோ அணைத்துவிட்டு செல்லும் பழக்கம் நம்மில் பலருக்கு இல்லை. இதனால் நம் சுற்றுசூழலுக்கு நேரடியாக பாதிப்புகள் இருக்கும். ஏனெனில், நம் பயன்படுத்தும் மின்சாரம் ஆயிரக்கணக்கான டன் நிலக்கரியை எரித்துதான் உற்பத்தி செய்யப்படுகிறது. நாம் சரியாக மின்சாரத்தை உபயோகிக்கவிட்டால் அதிக அளவில் மின் உற்பத்தி செய்ய வேண்டிய ஒரு கட்டாயத்தை ஏற்படுத்தும் என்பதை உணர்ந்தால் மிக நல்லது.

குப்பைகளை தரம் பிரித்து போடுங்கள்:

வீட்டில் சேரும் குப்பைகளுக்கு இரண்டு குப்பை தொட்டிகளை வைத்துக்கொள்ளுங்கள். ஒன்று மக்கும் குப்பைகளுக்கென்று, மற்றொன்று மக்காத பிளாஸ்டிக் போன்ற குப்பைகளுக்கு. மக்கும் குப்பைகளை வீட்டிலேயே மறுசுழற்சி செய்து பயனுள்ள உரமாக மாற்றலாம். இதற்கென்று நீங்கள் அதிகம் மெனக்கெட வேண்டியதில்லை.

சருகுகள் அல்லது மரத்திலிருந்து விழும் இலைகளை எரிக்காதீர்கள்:

சென்னை வாசிகளில் பலருக்கு குப்பைகள், குறிப்பாக காய்ந்த இலைகளை சுத்தம் செய்யவேண்டும் என்றால் உடனே அவர்கள் செய்யும் காரியம் அந்த காய்ந்த இலைகளை எரிப்பதுதான். இவ்வாறு செய்யும்பொழுது ஏற்படும் புகையை சுவாசித்தால் நம் நுரையீரல்களுக்குத்தான் சேதாரம் ஏற்படும். சுவாசம் சம்பந்தப்பட்ட நோய்களை நாம் எதிர்கொள்ள வேண்டிவரும். அதனால் இதை தவிர்க்கலாமே. அதிலும் குறிப்பாக போகி பண்டிகையின்போது பழைய பொருட்களை எரிப்பதை தவிர்க்கலாமே.

மறுசுழற்சி செய்யமுடியாத பிளாஸ்டிக் பொருட்களை சாலையில் வீசுவதை தவிர்க்கலாமே:

நம்மில் பலருக்கும் பஸ்ஸில் பயணம் செய்யும்போதோ அல்லது ரயிலில் பயணம் செய்யும்போதோ, பிளாஸ்டிக் பாட்டில்களை சாலையில் வீசியெறிவது நமக்கு ஒரு கைவந்த கலை. பிளாஸ்டிக் பாட்டிலோ, பையோ இரண்டுமே சுற்றுசூழலுக்கு ஒரு பெரிய சவால்தான். சிறிய பிளாஸ்டிக் பைகளை தெருவில் வீசுவதால் அவை சென்று மழைநீர் வடிகால்களில் அடைத்துக்கொள்ளும். பாட்டில்களை பொறுத்தவரை குப்பைஅள்ளுபவர்கள் எடுத்து சென்று விடுவார்கள். எனவே இதையும் நிச்சயம் தவிர்க்கலாமே.

மழைநீர் சேமிப்பு:

இந்தியாவிலே தமிழகம்தான் இந்த திட்டத்தை கட்டாயமாக செயல் படுத்த வேண்டுமென நடவடிக்கை முதல் முதலில் எடுத்தது . வீடு/அடுக்கு மாடி குடியிருப்புகள் கட்டி முடித்தபின் நிறைவு சான்றிதழ் மாநகராட்சியிலிருந்தோ அல்லது சென்னை பெருநகர வளர்ச்சி குழுமத்திடமிருந்தோ பெற வேண்டுமெனில் கட்டாயம் மழைநீர் சேமிப்பு கட்டமைப்பு ஏற்படுத்தியிருக்கவேண்டும். இதற்காக அதிக செலவொன்றும் ஆகாது. மேலும், தனி வீடாக இருப்பின், முன் புறமோ அல்லது பின் புறமோ முழுவதும் கான்கிரீட் தளமாக இல்லாமல் இயற்கையான மண் நிறைந்த இடமாக விடலாம். இதனால் மழை நீர் நிலத்தில் இறங்கி நிலத்தடி நீரின் பாதுகாப்பு உறுதி செய்யப்படும்.

பொது போக்குவரத்தை பயன்படுத்தினால் மாசு குறைய உதவலாமே:

சென்னை போன்ற பெரு நகரங்களில் தனிநபர் வாகன பயன்பாடு நாளுக்கு நாள் அதிகரித்து வருவது ஒரு கவலைக்குரிய விஷயம்தான். பல வீடுகளில் இன்று ஒன்றுக்கும் மேற்பட்ட வாகனங்கள் இருப்பது மிக சாதாரணமாகிவிட்டது. நமது பங்களிப்பாக எல்லா நாளும் வாகனத்தை எடுத்து செல்வதற்குபதில், பொது போக்குவரத்தை பயன்படுத்தினால் மனித உடலுக்கு எதிரியான கார்பன் மோனாக்சைடு வெளிப்படுவதை குறைக்கலாம்.

காடுகளுக்குள் சுற்றுலா செல்லும்போது கடைபிடிக்க வேண்டியவை:

சுற்றுலா, குறிப்பாக மேற்கு தொடர்ச்சி மலைப்பகுதிகளுக்கு செல்லும்போது பிளாஸ்டிக்கால் ஆன பொருட்களை எடுத்துச்செல்வதை தவிர்க்கலாம். சொந்த வாகனங்களில் செல்லும்பொழுது அலறும் விதமாக உங்கள் காரின் சவுண்ட் சிஸ்டத்தை பயன்படுத்தாமல் இருந்தால் நல்லது.