நடிகர் தர்மேந்திராவின் மரணச் செய்தியை சுமந்து வந்து,சினிமா ரசிகர்களைத் துயரத்தில் ஆழ்த்தி உள்ளது

நடிகர், தயாரிப்பாளர், அரசியல்வாதி என்னும் பல முகங்களைக் கொண்ட தர்மேந்திரா, நமது தமிழ் மண்ணில் இருந்து வடக்கே சென்று இந்தி சினிமாவை ஆட்சி செய்த கனவுக்கன்னி ஹேமமாலினியை மணந்ததால், தமிழ் நாட்டின் மருமகன் என்னும் சிறப்பையும் பெற்றவர்.

தர்மேந்திரா என்னும் பெயரைக் கேட்கும் போது, வனப்பும், ஆண்மையும் கொண்ட அவரது முகம் கண் முன் நிற்கிறது. இந்திய சினிமாவின் He Man என்று போற்றும் அளவுக்கு அவரது உடற்கட்டும், கம்பீரமும் இருந்தது. 1960 ல் தில் ‘பி தேரா ஹம் பி தேரே’ என்ற படத்துடன் அவரது திரைப்பயணம் ஆரம்பித்தது. தொடர் வெற்றிகளால் அவர் இந்தி சினிமாவின் தவிர்க்க முடியாத, அசைக்க முடியாத கதாநாயகனாக பல ஆண்டுகள் கொடி கட்டிப் பறந்தார். அதன் பின்னும் பலவித குணசித்திர வேடங்களில் ஜொலித்தார்.

அறுபதுகளில், எழுபதுகளில் இந்திப் படங்களின் இசையும், திரைக்கதையும், கதாநாயகிகளின் அலங்காரமும், நாயகர்களின் நடிப்பும், ,நடனமும், ஸ்டைலும் தமிழ் ரசிகர்களைக் கவர்ந்தன. மொழி தெரியாவிட்டாலும், அந்த மாய உலகு அவர்களை வசீகரித்தது. அளவில்லா பொழுதுபோக்கை அளிக்கும் உற்சாக ஊற்றாக இந்திப்படங்கள் விளங்கின.

அக்காலத்தில் எல்லா நகரங்களிலும் வாரத்தின் குறிப்பிட்ட நாட்களில் இந்தி திரைப்படங்களைத் திரையிடுவார்கள். இந்திப்படங்களை மட்டும் அல்லது காலைக்காட்சியாக வெளியிடும் அரங்குகளும் இருந்தன. பாலச்சந்தர், மணிரத்தினம், பாரதிராஜா, பாக்யராஜ் ஆகியோர் களத்தில் இறங்கிய பின்னே நம் மக்கள் தமிழ்ப்படங்களை விரும்பிப் பார்க்க துவங்கினர் .

அமிதாப், திலீப்குமார் ,சஞ்சீவ்குமார், தர்மேந்திரா, ஜிதேந்திரா, பிரான், ராஜேஷ் கண்ணா என்ற சென்ற தலைமுறை பெயர்கள் நம் மக்களிடையே பிரபலமாகின . பாபி, ஷோலே, யாதோன் கி பாரத் போன்ற படங்கள் நம் திரை அரங்குகளில் மெகா வெற்றி பெற்றன.

இவர்களில் தர்மேந்திரா தொடர் வெற்றிகளைக் குவித்தவர். அவரது படங்கள் பல இந்திய சினிமாவில் மைல் கற்களாக அமைந்தவை . ஷோலே வின் அபரிமித வெற்றியைத் தொடந்து, அந்த கதை அமைப்பை ஒட்டியே இந்தியில் மட்டுமல்ல பிற இந்திய மொழிகளிலும் பல படங்கள் உருவாக்கப்பட்டன. அமிதாப்பும், தரம் ஜி யும் விஜய் ஆகவும் வீரு ஆகவும் கலக்கி, திரை உலகில் ஒரு பிரளயத்தை உருவாக்கினார்கள்.வரும் டிசம்பர் மாதம் 12 ஆம் தேதி ஷோலே புதிய கிளைமாக்ஸுடன் ரீரிலீஸ் ஆக இருக்கிறது. அதை ரசிகர்களுடன் அமர்ந்துப் பார்க்க தரம் ஜி இல்லை.அவரது 90 வது பிறந்த நாளைக் கொண்டாடவும் அவர் இல்லை .

தரம் ஜியின் படங்களும் அவர் ஏற்ற கதாபாத்திரங்களும் இன்று வரை அவரது புகழைப் பேசுகின்றன. ‘பூல் அவுர் பத்தர்’ ‘ஆயி தின் பஹர்கே’ ‘யாதோன் கி பாரத்’, ‘சீதா அவுர் கீதா’ என்று வரிசையாக வெற்றிப் படங்கள் சுப்கே, சுப்கே திரைப்படத்தில் மீண்டும் அமிதாப்புடன் இணைந்தார். ஷர்மிளா தாகூர் ,ஜெயபாதுரி என்று அசத்தலான டீம் உடன் கலக்கிய படம் அது.

'பூல் அவுர் பத்தரில்' சக்தி சிங், 'சீதா அவுர் கீதா'வில் ராக்கா, 'யாதோன் கி பாரத்'தில் சங்கர், ‘அனுபமா’வில் அசோக், 'தில்லகி'யில் ஸ்வரன் கமல், ‘ஹகீகத்’ இல் கேப்டன் பஹதூர் சிங் என்று விதவிதமான கதாபாத்திரங்களில் தன் திறமையைக் காட்டி நடித்தார். ராக்கி அவுர் ராணி கி ப்ரேம் , தேரி பாடன் ஐசா துல்ஜா ஜியா ,அப்னே ஜானி கட்டார் ,லைஃப் இன் மெட்ரோ போன்ற படங்கள் அவரது குணசித்திர நடிப்பில் வெற்றி பெற்ற படங்கள்.

இந்திய சினிமாவில் தர்மேந்திராவின் பங்களிப்பு மிக மிக முக்கியமானது. அவரது தோற்றம், முக அமைப்பு, மென்மையான உடல் மொழி, நடனம் எல்லாமே அவரை ஒரு வெற்றி மிக்க திரை ஆளுமையாக உயர்த்தியது. அயல் நாட்டு நடிகர்களும் வியந்து பாராட்டும் அளவுக்கு அவரது திறமை இருந்தது.

பத்மபூஷன் விருது, பிலிம்பேரின் வாழ்நாள் சாதனையாளர் விருது போன்ற விருதுகளுடன், பாராளுமன்ற உறுப்பினராகவும் இருந்துள்ளார் தர்மேந்திரா.

இரு மனைவிகள், ஆறு பிள்ளைகள், திகட்ட, திகட்ட செல்வம், புகழேணியின் உச்சியில் நெடுநாள் வாழ்வு என்று குறையில்லாத நிறை வாழ்வு வாழ்ந்தவர் தர்மேந்திரா. அவரது நடிப்பும், ஸ்டைலும், உடை அலங்கார நேர்த்தியும், சென்ற தலைமுறையினரால் பெரிதும் ரசிக்கப்பட்டவை. அவர் புகழ் சினிமா உலகில் என்றும் நிலைத்திருக்கும் .

சென்று வாருங்கள் தரம் ஜி. உங்கள் பெயரை உங்கள் படங்கள் உச்சரித்துக் கொண்டே இருக்கும் .