திரைப்படம் :- Eighty one gold coin
மொழி ;- சீன மொழி
வருடம் :- 2012

Money may make life easier,
but it will never determine the value of life

ஒரு குழந்தையின் பார்வையில், குழந்தையின் மொழியில் இருந்து சொல்லப்படும் உணர்ச்சி ரீதியான ஒரு திரைப்படம். நான் பார்த்த சிறார் திரைப்படங்களில் என்னை மிகவும் கவர்ந்தத் திரைப்படங்களில் ஒன்று.

யாயா என்ற ஐந்து வயது சிறுமியைச் சுற்றி நிகழும் கதை . சீனாவின் ஏழ்மையான மலை கிராமத்தில் வாழும் ஐந்து வயதுக் குழந்தைதான் யாயா.
தங்கள் கிராமத்தில் நிலவும் வறுமை காரணமாக, அங்கிருக்கும் பெரும்பாலானோர் புலம் பெயர் தொழிலாளிகளாக, நாட்டின் வேறு இடங்களில் பணியாற்றிக் கொண்டு
இருந்தார்கள்.பெரும்பாலும் குழந்தைகள் வயதான பாட்டி, தாத்தாக்களின் பராமரிப்பில் வளர்கிறார்கள்.
குடும்பப் பொருளாதார பற்றாக்குறை காரணமாக, யாயாவின் அம்மாவும், அப்பாவுடன் வெளியே பணியாற்ற வேண்டிய சூழல். வேலைக்குச் செல்வதற்காக அம்மா தன்னுடைய உடமைகளை எல்லாம் பைகளில் வைத்துக் கொண்டிருக்கிறார். அப்போதுதான் அந்த சிறுமிக்கு தன்னுடைய தாயும் வெளி ஊருக்கு வேலைக்கு செல்லப் போகிறார் என்பது தெரிகிறது. தன்னை
விட்டுப் போக வேண்டாம் என்று அழுது அடம் பிடிக்கிறாள்.
நாம் நன்றாக வசதியாக வாழ வேண்டும் என்பதால் தானே அம்மாவும் வேலைக்கு செல்லப் போகிறேன். நான் இல்லாவிட்டாலும் பாட்டி உன் கூடவே இருந்து உன்னை நன்கு கவனித்துக் கொள்வார் என்று அவளுடைய அம்மா சமாதானம் செய்கிறார்.
தினமும் தன்னுடன் தொலைபேசியில் பேச வேண்டும்; விடுமுறை நாட்களில் தன்னை வந்து பார்க்க வேண்டும் என்று தாய்க்கு நிபந்தனை விதிக்கிறாள் யாயா
இரவு தூங்க வைக்கும் போது குழந்தையைக் கட்டி அணைத்துக் கொண்டு ஒரு கதை சொல்கிறார் அம்மா.

நீண்ட தாடியைக் கொண்ட வயதான தாத்தா ஒருவருக்கு நிறைய மந்திரங்கள் தெரியும்.
அவருடைய மந்திரங்களை, நல்ல பழக்கங்களோடு ஒழுக்கமாய் வளரும் குழந்தைக்குப் பரிசளிப்பார் என்று அம்மா கதையில் சொல்கிறார். கதையைக் கேட்டுக் கொண்டே
யாயா உறங்கிப் போய் விடுகிறாள். நீண்டதாடி கொண்ட தாத்தாவும். அவர் நிகழ்த்தும் அற்புதங்களும் அவள் மனதில் தங்கி விடுகிறது.

காலையில் அவள் எழுந்ததும், தன் அருகில் பார்க்கிறாள். அம்மா படுத்த இருந்த இடம் வெறுமையாய் இருக்கிறது.
அம்மா தன்னை விட்டுப் போய்விட்டார் என்பதை அறிந்து, அம்மா...அம்மா.. என்னை விட்டுப் போகாதே என்று அழுது கொண்டே பஸ் நிறுத்தம் வரை ஓடுகிறாள். ஆனால் அம்மா சென்று வெகு நேரம் ஆகிவிட்டது.

ஏமாற்றத்தோடு அழுது கொண்டு இருக்கும் தன் பேத்தியைப் பாட்டி சமாதானம் செய்து தன்னுடன் அழைத்துச் செல்கிறார்.
பாட்டி சின்னச் சின்ன கைவினைப் பொருட்கள் செய்தும், ஓவியங்கள் வரைந்தும், அதை விற்பனை செய்தும் வருகிறார். அவருடன் அவரது சைக்கிள் ரிக்ஷா போன்ற வாகனத்தில் அவளை அமர வைக்கிறார். அவர் விற்பனை செய்யும் இடத்தில் அமர்ந்து கொண்டு விற்பனை செய்கிறார்.
யாயா காலியான தண்ணீர் பாட்டில்களை ஒரு கயிற்றில் கோர்த்து, அதை அங்கும்
இங்கும் இழுத்துக் கொண்டு விளையாடிக் கொண்டு இருந்தாள்.

அப்போது அந்த வழியாக நீண்ட தாடியுடன் ஒரு வயதான தாத்தா தன்னுடைய வண்டியில் வந்து கொண்டிருக்கிறார். அவர் பழையப் பொருட்களைச் சேகரித்து விற்பனை செய்யும் தொழிலைச் செய்பவர்.
அந்தத் தாத்தாவைப் பார்த்ததும் சிறுமிக்கு அவள் அம்மா சொன்ன கதையில் வரும் நீண்ட தாடியுடைய மந்திரங்கள் தெரிந்த தாத்தா நினைவுக்கு வருகிறார். . தாத்தாவும் அவளிடம் இருக்கும் தேவையற்ற தண்ணீர் பாட்டில்களைத் தனக்குத் தருமாறு கேட்கிறார் . அதற்குப் பதிலாக ஒரு நாணயம் தருகிறார். அந்த நாணயம் தங்க முலாம் பூசப்பட்டது. பார்த்தால் தங்கக்காசைப் போலத் தெரிகிறது. இந்த நாணயம் அற்புதங்கள் நிகழ்த்தக்கூடியது என்ற தாத்தா அவளிடம் சொல்கிறார்.
" அந்த நாணயம் தனக்கும் அற்புதங்கள் நிகழ்த்துமா? என்று ஆவலோடு யாயா கேட்கிறாள்.கண்டிப்பாக நிகழ்த்தும். தினமும் தாத்தாவிற்கு இதுபோல தேவையற்ற தண்ணீர் பாட்டில்களை தந்தால் தாத்தா, அதற்கு பதிலாக தங்கக் காசுகளை தருவேன். நிறைய தங்க காசுகள் சேரும்பொழுது நிறைய அற்புதங்கள் உனக்கு நடக்கும் " என தாத்தா சொல்கிறார்.

தினமும் அங்கு வந்து அவளிடம் பாட்டில்களை பெற்றுக் கொள்வதாக உறுதியளித்துவிட்டு தாத்தா செல்கிறார்.
தாத்தா சொன்ன அனைத்தையும் உண்மை என்று அந்தக் குழந்தை நம்புகிறது. உடனே அவளது பாட்டியிடம் அந்த நாணயத்தை கொண்டு சென்று காட்டி , இது அற்புதங்கள் நிறைந்த தங்கக்காசு என்று சொல்லி மகிழ்கிறாள். . இதை வைத்துக்கொண்டு எனது அம்மா திரும்பி வரவேண்டும் என்று நான் வேண்டப் போகிறேன் . என் அம்மா வந்துவிடுவாங்க என்று மகிழ்ச்சியோடு அந்தக் குழந்தை அவளது பாட்டியிடம் சொல்கிறது.

குழந்தையின் ஏக்கத்தை போக்குவதற்காகவும், அவளுடைய தாயின் நினைவுகளைச் சற்று மறப்பதற்காகவும், பாட்டி அவளிடம் வேறு ஒரு கதை சொல்கிறார். இதுபோல நிறைய தங்க காசுகளைச் சேர்த்தால்தான் அற்புதங்கள் நிகழும். அதுவும் நீயாகத் தேடி தண்ணீர் பாட்டில்களைத் தாத்தாவிற்கு எடுத்து தர வேண்டும். என்று சொல்கிறார். அதற்கு எத்தனை காசுகள் சேர்க்க வேண்டும் என்று குழந்தை யாயா கேட்கிறாள்.
பாட்டி குத்துமதிப்பாக எண்பத்தியோரு தங்க காசுகள் சேர்க்க வேண்டும் என்று அந்த குழந்தையிடம் சொல்லிவிட்டார். அதை மனதார உண்மை என்று நம்பத் தொடங்குகிறாள் யாயா.
தினமும் பாட்டியுடன் சென்று , அருகே இருக்கும் இடங்களில் கீழே கிடக்கும் தண்ணீர் பாட்டில்களைச் சேகரிக்கத் தொடங்குகிறாள்.

இரண்டாவது நாள் மாலை நேரம் தாத்தா அங்கே வருவார் என்று வெகு நேரம் காத்துக்கொண்டிருக்கிறாள். ஆனால் தாத்தா வரவில்லை. அவள் சோர்ந்து போய் இரவு வீடு திரும்புகிறாள். அடுத்த நாளும் அங்கு வந்து தாத்தாவுக்காக காத்திருக்கிறாள். அவளுடன் பாட்டியும் காத்திருக்கிறார்.
அந்த வழியாக வரும் அந்தத் தாத்தா அவளை கவனித்துஅருகில் வருகிறார்.
தினமும் வருவதாக உறுதியளித்தீர்கள் . நேற்று நான் காத்திருந்தேன் நீங்கள் வரவில்லை என்று அந்த குழந்தை சொல்லும் பொழுது, தாத்தா மனம் நெகிழ்கிறது. தாத்தாவை மன்னித்துவிடு, நானும் இனிமேல் உன்னை போல உண்மையாக இருப்பேன். உனக்கு 81 தங்க காசுகள் சேரும் வரை தவறாமல் தினமும் இங்கு வருவேன் என்று சொல்கிறார்.

அதற்குப் பிறகு அந்த குழந்தையின் தேடல் முழுவதும் காலியான தண்ணீர் பாட்டில்களைச் சேகரிப்பதில் இருக்கிறது. யாராவது கையில் தண்ணீர் பாட்டிலை வைத்துக் கொண்டு சென்று கொண்டிருந்தால், அவர்கள் பின்னே இவளும் செல்வாள். அவர்கள் தண்ணீரைக் குடித்துவிட்டு கீழே வீசியதும், ஓடிச் சென்று அதைச் சேகரித்து வருவாள். மாலை தாத்தா எப்போது வருவார் என்று காத்திருப்பாள். தாத்தா வந்ததும் அந்தப் பாட்டில்களை பெற்றுக்கொண்டு இவளுக்குத் தங்கமூலாம் பூசிய அந்த நாணயத்தைக் கொடுப்பார்.
அந்த நாணயங்களைச் சேகரிப்பதற்காக பாட்டியிடம் ஒரு அழகியத் துணிப்பைத் தைத்து தரச் சொல்லி யாயா கேட்கிறாள். பாட்டி மிக அழகான கழுத்தில் மாட்டிக் கொள்ளக் கூடிய வகையில் ஒரு பை தைத்து தருகிறார். உறங்கும் நேரம் தவிர மற்ற நேரங்களில் அதை தன் கழுத்தில் மாட்டிக் கொண்டிருக்கிறார்.

டாண்டன் என்ற பக்கத்து வீட்டு சிறுவன் இவளுடைய சம வயது தோழன். அவனிடம் இந்த தங்க நாணயத்தைப் பற்றியும் அதன் நிகழ்த்தும் அற்புதங்களை பற்றியும் சொல்கிறாள்.
அவனுடைய தாயும் புலம்பெயர் தொழிலாளியாக வெளியே வேலை செய்து
கொண்டிருப்பவர்தான். தாத்தாவின் பராமரிப்பில் தான் அவனும் வசித்துக் கொண்டிருந்தான்.
அவனுக்கு யாயா மீது மிகுந்த அன்பு உண்டு. அவள் தண்ணீர் பாட்டில்களைத் தேடிச் செல்லும் பொழுது இவனும் கூடவே செல்வான்.
அப்படி ஒரு நாள் இருவரும் சென்று கொண்டிருக்கும் பொழுது, நகரத்திலிருந்து வரும் இருவர் அவர்களிடம் ஒரு கிராமத்திற்கான வழியைக் கேட்கிறார்கள். இவர்கள் உதவி செய்தவுடன் அதற்கு நன்றியாக அந்தப் பெண் கொஞ்சம் பணம் தருகிறார். ஆனால் யாயா பணத்தை மறுத்து விடுகிறாள். "அதற்குப் பதிலாக உங்களிடம் இருக்கும் காலி தண்ணீர் பாட்டில்களை கீழே போட்டு விடுங்கள். நான் எடுத்துக் கொள்கிறேன்" என்று சொல்கிறாள்.
அவளுடைய செய்கை அவர்களுக்கு வித்தியாசமாக இருக்கிறது. எதற்காக காலியான தண்ணீர் பாட்டில்கள் வேண்டும் என்று கேட்ட பொழுது குழந்தை அவர்களிடமும் அந்தக் காரணத்தைச் சொல்கிறாள்.
யாயாவை அந்தப் பெண்ணிற்கு மிகப் பிடித்து விடுகிறது. நீ எப்போதாவது பக்கத்தில் இருக்கும் நகரத்திற்கு வந்தால் இந்த எண்ணைத் தொடர்பு கொள். உனக்குத் தேவையான காலியான தண்ணீர் பாட்டில்கள் கிடைக்கும் என்று சொல்லிவிட்டுச் செல்கிறாள்.

இப்படி யாயா காலி தண்ணீர் பாட்டில்களைச் சேகரிக்கச் செல்லும் பொழுதெல்லாம்,பாட்டி இவளை காணவில்லை என்று துடித்துப் போய் தேடுவார். அந்த மலை கிராமத்தின் தலைவர் யாயாவை தேடி பாட்டியிடம் கூட்டிக் கொண்டு வருவார்.

தன் தோழிக்கு தேவையான தண்ணீர் பாட்டில்களை கொடுப்பதற்காக டாண்டன் ஒரு யோசனை செய்தான். அவனிடம் இருக்கும் பணத்திற்கு நிறைய தண்ணீர் பாட்டில்களை வாங்கிக் கொண்டு வந்தான். அந்த பாட்டில்களில் இருக்கும் தண்ணீரை முட்ட முட்ட குடிப்பதும், சிறுநீர் கழிப்பதும் , மீண்டும் நீர் குடிப்பதும் என்று ஐந்து பாட்டில்களையும் காலி செய்தான்..
அதைக் கையில் கொடுத்தால் வாங்கிக் கொள்ள மாட்டாள் என்பதால், தெருவின் ஓரங்களில் போட்டு விடுவான். அவளுடன் வரும் போது தேடிக் கண்டுபிடிப்பது போல அவளுக்குக்காட்டினான். . யாயாவும் மகிழ்வோடு துள்ளிக் குதித்து ஓடி எடுத்து வந்தாள். . தன் தோழியின் மகிழ்ச்சியைப் பார்த்து, தானும் மகிழ்ச்சி அடைந்தான்.
உண்மையில் குழந்தைகளுக்கு மட்டுமே மற்றவர்களை மகிழ்வித்து தானும் மகிழும் குணம்இருக்கிறது.

கொஞ்சம் கொஞ்சமாக அவள் நாணயங்களைச் சேர்த்துக் கொண்டு வருகிறாள்.
தாத்தாவிற்கு உடல்நிலை சரியில்லாத நேரத்தில் கூட யாயா ஏமாந்து விடக்கூடாது என்பதால்,அவருடைய பேத்திகள் அவரை வண்டியில் வைத்து தள்ளிக் கொண்டு வருவார்கள். அவர் காலி பாட்டில்களைப் பெற்றுக்கொண்டு அந்தத் நாணயங்களை தருவார்.

இன்னும் சில நாணயங்கள் மட்டும் சேர்க்க வேண்டி இருந்த நேரத்தில், நகரத்தில் நிறைய காலி பாட்டில்கள் கிடைக்கும் என்பதால் அங்கு தனியாகப் பயணிக்கிறாள். பாட்டிக்கு அவள் சென்றது தெரியாது.

நகரம் அவளுக்கு புதிதாக இருக்கிறது. இவள் தண்ணீர் பாட்டில்களைச் சேகரிக்கும் பொழுது,ஏற்கனவே அங்கு பழைய பொருட்களைச் சேகரித்துக் கொண்டிருக்கும் சிறுவன் அங்கு வருகிறான்.இது என்னுடைய ஏரியா. இங்கெல்லாம் நீ பொருட்களை எடுக்கக் கூடாது. உன்னை இங்கு
இனிப் பார்த்தால் அவ்வளவுதான். அடித்து விடுவேன் என்று மிரட்டுகிறான்.
பயந்து போய் அங்கிருந்து வேறு இடத்திற்குச் சென்று விடுகிறாள் யாயா.
ஒரு குப்பைத் தொட்டியில் காலி பாட்டில் இருப்பதைப் பார்த்து அதை எடுக்கும் பொழுது,அவள் கழுத்தில் மாட்டியிருந்த நாணயங்கள் அடங்கிய பை கீழே விழுந்து விடுகிறது.
சிறிது தூரம் சென்ற பிறகுதான் அவளுக்கு தன்னுடைய பை தொலைந்தது தெரிகிறது.
யாரையும் தெரியாத அந்த நகரத்தின் தெருக்களில் கதறி அழுது கொண்டே தன்னுடைய பையைத் தேடுகிறாள்.
அவன் அழுகையை பார்த்து பரிதாபப்பட்ட இரு சிறுமிகள் இவளுக்கு உதவ முன்
வருகிறார்கள். இவள் வைத்திருந்த தொலைபேசி எண்ணைத் தொடர்பு கொண்டு பேசுகிறார்கள்.
யாயா நகரத்தில் அழுது கொண்டிருப்பதாகவும் கிராமத்திற்கு வழி தெரியவில்லை என்று சொல்கிறார்கள்.
அந்த தொலைபேசி எண், ஒருமுறை இவள் மலை கிராமத்தில் வழிகாட்டியதற்காக ஒரு பெண்மணி தந்த எண். நிலைமையை அறிந்த அந்தப் பெண் அங்கு வேகமாய் வந்து, யாயாவைப் பார்க்கிறார்.

யாயாவைக் காணாமல் பாட்டியும் அந்தப் பகுதியின் தலைவரும் அனைத்து இடங்களிலும் தேடிக் கொண்டிருக்கிறார்கள். அந்த நேரத்தில் இந்தப் பெண் யாயாவை பாட்டியிடம் ஒப்படைக்கிறாள்.
தன்னுடைய நாணயங்கள் அடங்கியப்பை தொலைந்ததால் யாரிடமும் பேசாமல்
எப்பொழுதும் சோகத்திலேயே இருக்கிறாள்.

நகரத்தில் இவளுக்கு உதவிய அந்த சிறுமிகளும், இவளைப் பாட்டியிடம் சேர்த்த
பெண்மணியும் அந்த நாணயப் பையை கண்டுபிடித்துக் கொண்டு வந்து சிறுமியிடம் தருகிறார்கள்.
81 நாணயங்கள் யாயாவிடம் சேர்ந்து விடுகிறது.
இனி அற்புதம் நிகழ்ந்து விடும் என்று அந்தக் குழந்தை மகிழ்கிறது. அந்தக் குழந்தையின் நம்பிக்கையும், விடாமுயற்சியும் வெற்றி பெறுகிறது.

யாயா உன் நாணயங்கள் அற்புதம் நிகழ்த்திவிட்டது. உன்னுடைய அம்மா வந்து
கொண்டிருக்கிறார் " என்று டாண்டன் சொல்லிக்கொண்டே ஓடி வருகிறான்.

கருணை உள்ளம் கொண்ட நபர்களின் உதவியுடன், யாயா தனது இழந்த நாணயங்களை மீட்டெடுத்து தனது தாயுடன் மீண்டும் இணைகிறாள்.

இந்தத் திரைப்படம் முழுக்க முழுக்க குழந்தைகளின் உணர்வுகளை , குழந்தைகளின் மொழியில் உணர்த்தும் ஒரு திரைப்படம்.
குழந்தைகளுக்குச் சொல்ல வேண்டிய நல்ல கருத்துக்களை, போகிற போக்கில்
உரையாடல்களில் கொண்டு செல்வதும் இந்த திரைப்படத்தின் சிறப்பு.

குழந்தைத் தன்மையை எந்த இடத்திலும் மிகைப்படுத்தாமல், இயல்பாய் காட்சிப்படுத்தி இருக்கும் விதம் இந்தப் படத்தின் பலம். கண்டிப்பாக இந்தத் திரைப்படத்தை குழந்தைகள் மட்டுமல்லாமல் பெரியவர்களும் பார்க்க வேண்டும். அப்பொழுதுதான் குழந்தைகளின் அகஉலகம் நமக்கு பிடிபடும்