நம் விகடகவியில் போன வருடம் மோகன் ஜி அவர்களின் ‘பல்ப் சீரீஸ்’ எனும் நகைச்சுவைத் தொடர் வெளியானது.

இது இப்பொழுது நேர்த்தியான நூலாக ‘பல்ப் சீரீஸ்’ என்ற பெயரில் வெளியாகியிருக்கிறது.

பல்ப் சீரீஸுக்கு நம் ஆசிரியர் மதன் அவர்கள் அழகான வாழ்த்துரை வழங்கி சிறப்பித்திருக்கிறார்.

இனி மதன் சாரின் வாழ்த்துரை :-

விகடகவி இதழில் தொடராக வந்த எழுத்தாளர் மோகன்ஜி எழுதிய பல்ப் சீரீஸ் புத்தகம் வெளிவரப் போகிறது என்கிற தகவலைச் சொன்ன நண்பர் எழுத்தாளர் வெங்கடகிருஷ்ணன், அந்தப் புத்தகத்தை என்னிடம் கொடுத்து, உங்கள் வாழ்த்துரை வேண்டும் என்று மோகன்ஜி விரும்புகிறார் என்றார்.

மோகன்ஜி சுவையாக எழுதக்கூடிய திறமையான எழுத்தாளர் என்பது எனக்கு தெரியும். ஆகவே உடனே ஒப்புக்கொண்டு புத்தகத்தை மீண்டும் ஒருமுறை படித்தேன். இரண்டாவது முறை படித்த போதும் துளியும் போரடிக்கவில்லை என்பதை நான் சொல்லியாக வேண்டும்!

வளவளவென்று எழுதாமல் கச்சிதமாக, மெலிதாக இழையோடும் நகைச்சுவையோடு எழுதும் திறமை மோகன்ஜியிடம் நிறையவே இருக்கிறது. தன்னைச் சுற்றிலும் நடக்கும் சாதாரண விஷயங்களுக்கும் ஆச்சரியப்படும் அளவிற்கு உயிர் கொடுத்திருக்கிறார் மோகன்ஜி.

என்னைக் கவர்ந்த இன்னொரு விஷயம் ஒவ்வொரு கட்டுரையிலும் அவர் காட்டியிருக்கும் வித்தியாசம்- அதாவது வெரைட்டி! (கட்டுரை என்று சீரியஸான வார்த்தையை உபயோகிக்க தயக்கமாக இருக்கிறது. ‘பல்பு’ என்று சொல்லலாமா?)

‘பல்பு சீரீஸ்’ புத்தகத்தை ஒரே மூச்சில் படித்தேன் நான். அடுத்த பல்ப் எதைப் பற்றி இருக்கும் என்கிற ஆர்வம் எனக்குத் தொடர்ந்து இருந்து கொண்டிருந்தது என்பதையும் நான் சொல்லியாக வேண்டும்.

மோகன் ஜி நமக்கு கிடைத்துள்ள ஒரு திறமையான எழுத்தாளர். இங்கே நகைச்சுவையுடன் எழுதக்கூடிய எழுத்தாளர்கள் குறைந்து கொண்டு வருகிறார்கள். ஆகவே மோகன்ஜியின் பல்ப் சீரிஸை படித்தபோது எனக்குக் கூடுதல் மகிழ்ச்சி ஏற்பட்டது.

ட்ரெயினிலோ பஸ்ஸிலோ வெளியூர் எங்காவது செல்லும்போது இந்தப் புத்தகத்தை கையோடு எடுத்துச் சென்றால் நேரம் போவதே தெரியாது என்பதை உங்களுக்கு நான் உத்தரவாதமாகச் சொல்லிக் கொள்கிறேன்.

மோகன்ஜி தொடர்ந்து நகைச்சுவையோடு கூடிய புத்தகங்களை எழுதி, தமிழ்நாட்டில் ஒரு முக்கியமான புகழ்பெற்ற எழுத்தாளராக வேண்டும் என்று அவரை வாழ்த்துகிறேன்.

மதன்

சென்னை

06 நவம்பர் 2025

புத்தகம் வேண்டுவோர் mohanji.ab@gmail.com என்ற மின்னஞ்சலில் தொடர்பு கொள்ளலாம்.