சுருதி அழகோ அழகு! பெற்றோர்களின் செல்ல மகள் மட்டும் அல்ல, 200 குடும்பங்கள் கொண்ட பெரிய அபார்ட்மெண்டில் வசிக்கும் அநேக பேரின் செல்ல மகளும் கூட. அழகான மழலைக் குரலில் அவள் பேசுவதே பாடுவது போல இருக்கும். நான்காம் வகுப்பு படிக்கும் சுட்டி பெண்.

அன்று மாலை, சுருதி தனது அம்மாவின் கையைப் பிடித்தபடி அபார்ட்மெண்ட்டின் நடுவில் அமைந்துள்ள பெரிய பூங்காவிற்கு விளையாட வந்தாள். அவளைப் பார்த்தவுடன் அவள் நட்பு வட்டம் ஒடி வந்து சூழ்ந்து கொண்டது. ஒரே விளையாட்டு, ஆட்டம், பாட்டம் என சந்தோஷமாக இருந்தது. குழந்தைகளின் அம்மாக்களும் ஒருவருக்கொருவர் விஷயங்களைப் பகிர்ந்து பேசிக் கொண்டிருந்தனர்.

அப்போது அங்கே வந்த அபார்ட்மெண்ட் செக்யூரிட்டிகளில் (புதியவர்) ஒருவர்,

“மா, உங்க பாப்பாவிற்கு எப்படி மரியாதையாக பேசணும்னு சொல்லிக்கொடுங்க மா. நேத்துப் பார்த்துட்டு ‘சீ போடா’ன்னு சொல்லிட்டு ஓடியுட்டா…”

என்று சுருதியின் அம்மாவிடம் கூறினார்.

சுருதியின் அம்மா உடனே, “தவறா நினைக்காதீங்க. சுருதி நல்ல பொண்ணு தான். இருப்பினும் நான் கண்டிப்பேன்,”

என்று சொன்னாள்.

எல்லோரின் முன்னிலும் தனது குழந்தையைப் பற்றிப் புகார் கேட்டது அவளுக்கு வருத்தம் அளித்தது. இரவு உணவைச் சாப்பிட வைத்தபின் சுருதியை அன்புடன் அருகில் அமர வைத்து மெதுவாகக் கேட்டாள்:

“கண்ணுக்குட்டி, சுருதி மா… நீ நல்ல பெண்ணு தானே? அம்மா ஒரு கேள்வி கேட்கறேன், பதில் சொல்றியா?”

“என்னம்மா, கேளு…”

“செக்யூரிட்டி அங்கிள் கிட்ட நீ மரியாதை இல்லாம பேசினியா?”

“யாரு மா? அந்த புது அங்கிளா?”

“ஆமாம்.”

“பேசினேன்.”

“ஏன் டா கண்ணு அப்படிப் பேசினே? பெரியவர்களிடம் சுருதி குட்டி மரியாதையா நடந்துப்பாளே?”

“இல்ல மா… நீ எனக்கு என்ன சொல்லிக்கொடுத்தே?

எந்த பாய்ஸும், கேர்ள்ஸும் என்னைத் தொட்டு பேசக்கூடாதுன்னு… ‘குட் டச்–பேட் டச்’, இல்ல ‘டோண்ட் டச்’ன்னு சொல்லி இருக்கே! அப்படின்னு நீ சொல்லி வைத்து நான் விளையாடப் போகும் போது அந்த அங்கிள் என்னைத் தொட்டாரு.”

“அங்கிள் என்னை ‘தொடாதீங்க’ன்னு சொன்னேன்… கேக்கல. எனக்கு கோவம் வந்தது. அதனால்தான் ‘சீ போடா’ன்னு சொன்னேன். சாரி மா…”

அவளது விளக்கம் கேட்டு சுருதியின் அம்மா எந்தப் பதிலும் சொல்ல முடியாமல் ஒரு நொடி மவுனமாக இருந்தாள். பின்னர் அவளை அணைத்துக் கொண்டு, “இல்ல டா கண்ணு… நீ சரியாகத்தான் சொன்னிருக்கே,” என்று அமைதியாக கூறினாள். அத்துடன் கதையைச் சொல்லி தாலாட்டி தூங்க வைத்தாள்.

பெண் குழந்தைகள் தேவதைகள் போன்றவர்கள். அவர்களை கொண்டாடவில்லை என்றாலும் பரவாயில்லை; பாதுகாப்பு தருவது ஒவ்வொருவரின் கடமை அல்லவா?

என்று எண்ணியபடி, ஊரிலிருந்து நாளை வர இருக்கும் கணவனிடம் இதைப் பற்றி சொல்லி, அந்த செக்யூரிட்டியைப் பற்றி விசாரித்து கண்டிக்கச் சொல்ல வேண்டும் என்று முடிவு செய்தாள்.