நவராத்திரி’யில் சிவாஜியின் நவரசத் தோற்றத்தை போல்

பல்நோக்கு தகவல்களை நவரச கோணங்களில் வழங்கும் விகடகவி!

வாசகர்கள் வாழ்த்து

விகடகவியின் 9-ம் ஆண்டு பிறந்த நாளை முன்னிட்டு, சென்னை சுற்றுவட்டாரப் பகுதி வாசகர்களை நேரில் சந்தித்தும், வெளியூர் வாசகர்களை தொலைபேசியில் தொடர்பு கொண்டு கருத்துகளைக் கேட்டறிந்தோம். இவற்றில் சென்னையைச் சேர்ந்த பாண்டுரங்கன், திலோத்தாமை, ராதா வெங்கடேசன், காஞ்சிபுரத்தைச் சேர்ந்த பாகீரதி, ஜானகி, புருஷோத்தமன், ஊத்துக்கோட்டையைச் சேர்ந்த மாயா குப்புசாமி, ஜமுனா பிரபாகரன் அளித்த கருத்துகள்தான் ‘ஹைலைட்’டாக மகிழவைத்தது.

இனி, விகடகவி வாசகர்களின் கருத்துகளைப் பற்றி தெரிந்து கொள்வோமா? “கைக்குழந்தையாக விகடகவி பிறந்தது முதல் இன்றுவரை தொடர் வாசகர்களாக இருப்பதில் பெருமை கொள்கிறோம். உலக நடப்புகள், இரு நாடுகளிடையே போர் மற்றும் குழப்பங்கள், அமெரிக்க அரசின் நாட்டாமை, கேலிக்கூத்துகள், மத்திய-மாநில அரசியல், கொள்கைகள், சட்டங்கள், அதனால் சாதக-பாதகங்கள், சினிமா, கலை, இலக்கியம், காவியம், கவிதை, அக்கால ஓவிய நகைச்சுவை துணுக்குகள், ஆன்மீகம், எளிய ஒரு பக்க வாழ்க்கை கதைகளை நவரச கோணங்களில் அலசி ஆராய்ந்து கட்டுரையாகத் தருவதில் ‘விகடகவி’யின் ஸ்டைலே அலாதி!

அதிலும் அரசியல் சாணக்கியர் ஜாசனின் பல்வேறு தலைப்பு கட்டுரைகள், ராஜேஷ் கண்ணாவின் நீதிமன்ற மற்றும் புதிய சட்டங்களால் நிகழும் சாதக-பாதகங்கள், சினிமாவுக்கு லைட்பாய், ராமின் இமயமலை ஆன்மீக பயணம், ஹாங்காங் மலையேற்ற சுவாரசியங்கள், ஒலி நாடாவில் பறவைகளின் ஒலி, இயற்கை மணம் கமிழும் திரைப்பட இயக்குநரின் துணுக்கு கவிதை, ஆன்மீக, திருத்தல மகிமை, விரத மற்றும் பண்டிகை கொண்டாட்ட தகவல்களுக்கு ஆரூர் சுந்தரசேகர், மீனா சேகர், பால்கி உள்பட பலர், அறிவியல், உலக நடப்புகள் மற்றும் மருத்துவ, விஞ்ஞான, இசை கட்டுரைகளுக்கு தில்லைக்கரசி, மரியா சிவனாந்தம், கோமதி உள்பட மகளிரணி, இவர்களின் விரிவான தகவல்களை சுருக்கி, தேவையில்லாத வார்த்தைகளை சுருக்கி, விகடகவி குழுவினரை திறமையாகக் கையாள்வதிலும், நையாண்டி கார்ட்டூன் வரைவதிலும் ஆசிரியர் மதன் சமர்த்தராகவும், சகல கலா ‘விகடகவி’யாகவும் இன்றளவும் விளங்கி வருகிறார்.

இவற்றையெல்லாம் ஒட்டுமொத்தமாக இணைத்து பார்க்கும்போது, நடிகர் திலகம் சிவாஜி கணேசனின் 100-வது படமான ‘நவராத்திரி’ திரைப்படத்தில் வீட்டைவிட்டு வெளியேறும் கதாநாயகி சாவித்திரி சந்திக்கும் மனநல மருத்துவர், முரடன், கதாநாயகன், கிராமவாசி, காவல்துறை அதிகாரி, மனைவியை இழந்து குழந்தையுடன் வாழும் பணக்கார வாலிபர் உள்பட நவரச (9) தோற்றங்களில் பல்வேறு முகபாவங்களுடன் ஏற்ற, இறக்கங்களுடன் நடிகர் திலகம் சிவாஜி கணேசன் வசனங்கள் பேசி ரசிகர்களை மலைக்க வைப்பார். இப்படம் ரசிகர்களின் பேராதரவுடன் வருடக்கணக்கில் சாதனை படைத்தது. இச்சாதனையை அதன்பிறகு வெளிவந்த படங்களால் முறியடிக்க முடியாமல் திணறி வருகின்றன.

‘நவராத்திரி’ படத்தில் கதாநாயகி சாவித்திரியாக விகடகவி வாசகர்களைப் பாவித்து, நடிகர் திலகம் சிவாஜி கணேசனின் நவரசத் தோற்றங்களில் பல்வேறு முகபாவங்களுடன் ஏற்ற இறக்கங்களுடன் பேசுவதைப் போல், உலக மற்றும் இந்திய அரசியல் நடப்புகள், அறிவியல், தொழில்நுட்ப வளர்ச்சியின் சாதக-பாதகங்கள் உள்பட பன்னோக்கு தகவல்களை பலவித பரிமாணங்களில் சுருக்கமான கட்டுரைகளை வழங்குவதில் இன்றுவரை டிஜிட்டல் தமிழ் வாரப் பத்திரிகையாக ‘விகடகவி’ வெற்றிகரமாக சாதனை படைத்து வருகிறது.

‘நவராத்திரி’ படத்தில் சிவாஜியின் நவரச தோற்றங்கள் மற்றும் வசனங்களை ஒருங்கிணைத்து, இப்படத்தை வெற்றி பெறவைத்த இயக்குநரைப் போல், குழுவினரின் பன்னோக்கு தகவல்களை மதன் தலைமையிலான குழுவினர் சுவைபட சுருக்கமாக வழங்குவதில், கடந்த 8 ஆண்டுகளாக ‘விகடகவி’ இமாலய சாதனை படைத்து வருகிறது. தற்போது 9-ம் ஆண்டு பிறந்த நாளை கொண்டாடும் விகடகவிக்கு நீண்ட கால வாசகர்களாகிய நாங்கள் பெருமிதத்துடன் வாழ்த்து தெரிவித்துக் கொள்கிறோம்…” என்று மகிழ்ச்சியுடன் வழியனுப்பி விடைகொடுத்தனர்.