எதிர்பாராமல் நேர்ந்த அந்த திருப்பம் பற்றி.....சொல்கிறார் சூரியபிரபா - சௌராஷ்ட்ர தமிழ் சங்கமம் 2023

முதலில் ஸ்ரீபால்கா தீர்த்தம், இங்கு இங்கிருந்து தான் பகவான் ஸ்ரீகிருஷ்ணர் ஜரா என்ற வேடனின் அம்பினால் ஒரு அரசமரத்தடியில் அமர்ந்திருந்த பொழுது தாக்கப்பட்டு தமது இறுதிப் பயணத்தைத் தொடங்கியதாக அறியப்படுகிறது. அதே போன்ற அமர்ந்த கோலத்தில் இங்கு பகவான் ஸ்ரீகிருஷ்ணர் நமக்கு அருள்பாலிக்கிறார். இங்கு பால்கா தீர்த்தில் அவர் வழிபட்ட சிவலிங்கமும் தீர்த்தகுளத்தில் உள்ளது சிறப்பு.

[ஸ்ரீக்ருஷ்ணன் பால்கா தீர்த்தத்தில் மரத்தடியில் அமர்ந்திருக்கிறார்]

இந்த ஸ்தல வரலாறு நாம் ஆலயத்தினுள் நுழையும் இடத்திலேயே கல்வெட்டாக வைக்கப்பட்டிருக்கிறது. அதைப் படிக்கும் போதே அங்கு நீராட வாய்ப்பு ஏற்படுத்தித் தந்திருந்தால் நன்றாக இருக்குமே என்று எண்ணினேன். ஆனால் எதிர்பாராமல் நேர்ந்தது அந்த திருப்பம்.

இந்த ஸ்ரீபால்கா தீர்த்த குளத்தில் தான்

யாருக்குமே கிட்டாத வாய்ப்பு எனக்கு கிட்டியது. அதை தெய்வ சங்கல்பம் என்று சொல்வதா இல்லை; ஈஸ்வரன் திருவிளையாடல் என்பதா, ஸ்ரீகிருஷ்ண லீலை என்பதா என்று நான் முதலில் அறியவில்லை. தீர்த்தகட்டத்தின் மூன்றாவது படிக்கட்டு சற்று வெட்டுப் பட்டுள்ளதை அறியாத நான், தீர்த்தத்தை எடுக்க குளத்தில் இறங்கும் பொழுது அந்த படியில் கால் இடறி மூன்று முறை படியில் அங்கப் பிரதக்ஷ்ணம் செய்து குளத்தினுள் மூழ்கி எழுந்தேன்.

அது ஒரு விபத்தாக நிகழ்ந்தாலும், அதற்கு முன்பின் நடந்த நிகழ்வுகள் இது முழுக்க முழுக்க தெய்வ சித்தம் என்பதை எனக்கு உணர்த்தியது.

இங்கு சிவபெருமானுக்கும் தனி சந்நிதானம் அமைந்துள்ளது. தீர்த்த நீராடலுக்கு பின் தான் நான் சிவபெருமானை தரிசித்தேன்.

இந்த சௌராஷ்டிர தமிழ் சங்கமத்தில் எனக்கு மட்டும் கிடைத்த இந்த தனித்துவமான சில அனுபவங்களைத் தொடர்ச்சியாக எழுதினால் நன்றாக இருக்கும் என்ற காரணத்தினால், தீர்த்தக் கட்ட சம்பவத்தில் இருந்து, மருத்துவர் பரிசோதித்த பின்னர் இறைவன் செய்த அற்புத சிகிச்சை வரை தொடர்ச்சியாக எழுதிவிட்டேன்.

இனி ஸ்ரீபால்கா தீர்த், தரிசனத்தில் இருந்து நாம் பிரபாஸ் பாடனில் உள்ள பிற ஆலய தரிசனங்களைத் தொடர்வோம்.

ஸ்ரீபால்கா தீர்த்தின் வெளிப்புறம் இடப்பக்கம் பிரம்மாண்ட சிவலிங்க வடிவில் இந்த தீர்த்தகட்ட வரலாறு காட்சிப்படுத்தப் பட்டுள்ளது. அருகில் மற்றொரு கூடத்தில் மழலையாக பகவான் ஸ்ரீகிருஷ்ணர் பக்தர்கள் பொன்னூஞ்சலாட்ட காட்சி தருகிறார்.

இரண்டாவது, அருகிலேயே ஸ்ரீகோலோக்தாம் தீர்த்தக் கட்டத்திற்கு சென்றடைந்தோம்.

இவ்விடம் ஹிரண் நதிக்கரையில் அமைந்துள்ளது. இந்த நதிக்கரையில் தான் அர்ச்சுனரால் பகவனின் பூதவுடலுக்கு இறுதி மரியாதை செய்யப்பட்டதாக குறிப்புகள் கூறுகின்றன. அதையடுத்து, அவருக்கு கிரியைக் காரியங்கள் திரிவேணி சங்கமத்தில் செய்யப்பட்டதாகவும் புராணக் குறிப்புகள் கூறுகிறது. ஸ்ரீ பால்கா தீர்த்தில் ஜரா என்ற வேடனால் காலில் அம்பெய்யப்பட்டு தன் அவதார நோக்கம் நிறைவடைந்ததால், மெல்ல நடந்து அருகிலேயே இந்த ஹிரண் நதிக்கரையில்

கோலோக்தாம் தீர்த்தத்தை அடைந்தார். இங்கு தான் தனது பூதவுடலை நீத்து சொர்க்க யாத்திரைப் பயணத்தை மேற்கொண்டதால், இவ்விடத்தில் தேஹொத்சர்காவும் அமைந்துள்ளது.

[ஸ்ரீக்ருஷ்ணனின் சரண் பாதுகா]

[தேஹோர்த்சர்க்கா கோலக்தாம்]

பகவானது பூதவுடலுக்கு இறுதிக்காரியம் செய்யப்பட்டதாக குறிப்புகள் கூறும், இந்த ஹிரண் நதியிலும் நாங்கள் தீர்த்தம் எடுத்துக் கொண்டோம்.

இங்கு சன்னிதானத்தில் பகவான் ஸ்ரீகிருஷ்ணர் ஸ்ரீகீதா மந்திரில் குழலூதும் கண்ணனாகவும், அதையடுத்த சந்நிதியில் ஸ்ரீலட்சுமி-நாராயணன் தம்பதி சமேதராகவும் அருள்பாலிக்கின்றனர். இங்கிருந்து தான் ஸ்ரீகிருஷ்ணரின் சகோதரரான பலராமரும் தமது உண்மையான சர்ப்ப வடிவில் மோட்சம் அடைந்தார். இங்குள்ள கீதா மந்திரில் பளிங்கு தூண்களில் கீதாசாரம் முழுவதும் பொறிக்கப்பட்டுள்ளன.

அடுத்ததாக ஹிரண், கபிலா மற்றும் சரஸ்வதி நதிகள் சங்கமிக்கும் திரிவேணி சங்கமத்தில்

தீர்த்தம் எடுத்துக் கொண்டு பின்னர், அதற்கு எதிர்புறத்தில் அமைந்துள்ள ஸ்ரீகாம்நாத் மகாதேவர் ஆலய தரிசனமும்

அங்கு பாதாள அடியில் அமையப்பெற்ற ஆதி சங்கராச்சாரியார் குகையில் அவர்தன் நான்கு பிரதான சீடர்களுடன் வீற்றிருக்கும் தபோ கோலமும் தவழ்ந்து கீழிறங்கி சென்று கண்டு தரிசித்தோம்.

முன்னாளில் குகை போன்ற அமைப்பு இருந்தது, தற்சமயம் நன்கு பராமரிக்கப்பட்டு கட்டமைக்கப்பட்டு வழிபாட்டிற்காக பராமரிக்கப்படுகின்றது. இங்கு சரஸ்வதி தேவி, மஹா மேரு, சாரதா தேவியுடன் பன்னிரு ஜோதிர்லிங்க தரிசனமும் கண்டோம்.

இந்த தனது சௌராஷ்ட்ர தமிழ் சங்கம யாத்திரை அனுபவங்களை அடுத்த வாரம் நிறைவு செய்கிறார் சூரியப்ரபா.