தூய்மையான மற்றும் பசுமையான போக்குவரத்து முறையை நோக்கி இந்திய ரயில்வே "NaMo Green Rail" (நமோ கிரீன் ரயில்) என்ற கருப்பொருளைக் கொண்ட இந்த ரயில், வடக்கு ரயில்வேயின் (Northern Railway) டெல்லி பிரிவால் இயக்கப்பட்டு பராமரிக்கப்படும்.

இந்த ஹைட்ரஜன் ரயில் ஜூலை 19 முதல் ஜிந்த்-சோனிபட் வழித்தடத்தில் தனது வணிக ரீதியான சேவையைத் தொடங்கும்.

ஜிந்த்-சோனிபட் ஹைட்ரஜன் ரயில் 74009 மற்றும் 74010 ஆகிய எண்களுடன் தினமும் இயக்கப்படும். இது 89 கி.மீ தூரத்தை மணிக்கு 75 கி.மீ வரையிலான வேகத்தில் இரண்டு மணி நேரத்தில் கடக்கும். இடையில் 12 ஸ்டேஷங்களில் நிற்குமாம்.

இந்த ரயில் நம்ம பெரம்பூர்லத்தான், இன்டகரல் கோச் ஃபேக்டரியால் (ICF) உருவாக்கப்பட்டுள்ளது.

ரெயில்ஒன் மொபைல் செயலியின்படி, ஜிந்த் சந்திப்பிலிருந்து அடுத்த நிலையமான ஜிந்த் சிட்டி வரையிலான சாதாரண வகுப்பு கட்டணம் ரூ.10 ஆகும். முழு ஜிந்த்-சோனிபட் தூரத்துக்கு ஒரு சாதாரண வகுப்பு டிக்கெட்டுக்கு ரூ.25 ஆகும்.

ஹைட்ரஜன் ரயிலின் முக்கிய அம்சங்கள்:

1. 10 பெட்டிகளைக் கொண்ட ஹைட்ரஜன் எரிபொருள் கலன் அடிப்படையிலான ரயில் அமைப்பு.

2. 1200 kW திறன் கொண்ட ஹைட்ரஜன் எரிபொருள் கலன் உந்துவிசை அமைப்பால் (propulsion system) இயக்கப்படுகிறது.

3. மணிக்கு 110 கி.மீ வடிவமைப்பு வேகத்தைக் கொண்ட இது, அதிகபட்சமாக மணிக்கு 75 கி.மீ வேகத்தில் இயக்க ஒப்புதல் அளிக்கப்பட்டுள்ளது.

4. சுமார் 2,600 பயணிகள் பயணிக்கும் திறன் கொண்டது.

5. வடிவமைப்பு நிலை முதல் முன்மாதிரி (prototype) தயாரிப்பு வரை உள்நாட்டிலேயே உருவாக்கப்பட்ட இந்தத் திட்டம் ஆத்மநிர்பர் பாரதத்தின் பார்வையை நிரூபிக்கிறது.

இந்த ரயிலில் இரண்டு ஹைட்ரஜன் இயக்கி ஆற்றல் பெட்டிகள் (DPC-கள்) மற்றும் எட்டு டிரெய்லர் பெட்டிகள் (TC-கள்) உள்ளன. ஒவ்வொரு DPC-யிலும் எரிபொருள் செல்கள், லித்தியம் இரும்பு பாஸ்பேட் (LFP) பேட்டரிகள் மற்றும் ஹைட்ரஜன் சேமிப்பு உருளைகள் (சிலிண்டர்கள்) பொருத்தப்பட்டுள்ளன.

உற்பத்தி, சேமிப்பு மற்றும் விநியோக நிலையங்களில் ஹைட்ரஜன் கசிவைக் கண்டறியும் கருவிகள் பொருத்தப்பட்டுள்ளன.

தொடர்ச்சியான கண்காணிப்பிற்காகத் தீப்பிழம்பைக் கண்டறியும் கருவிகளும் (flame detectors) பொருத்தப்பட்டுள்ளன.

பாதுகாப்பு உணரி (sensor) கருவிகள் வழக்கமான ஆய்வு மற்றும் சுத்தம் செய்யும் பணிக்கு உட்படுத்தப்படும்.

தடையற்ற காற்றோட்ட அமைப்பு மூலம் ரயிலுக்குள் எப்போதும் காற்று சுழற்சி உறுதி செய்யப்படுகிறது.

வெப்பம், தீப்பிழம்பு அல்லது புகை போன்ற அசாதாரணமான ஏதேனும் கண்டறியப்பட்டால், இந்த அமைப்பால் தானாகவே ஹைட்ரஜன் விநியோகத்தைத் துண்டிக்க முடியும்.

அவசர காலங்களில் ரயிலைப் பாதுகாப்பான இடத்திற்குக் கொண்டு செல்ல உதவும் வகையில், லோகோ பைலட் (ஓட்டுநர்) அறை ஒரு சிறப்புச் செயல்பாட்டு முறையுடன் வடிவமைக்கப்பட்டுள்ளது.

முழு அமைப்பின் தற்போதைய செயல்பாட்டு நிலையை ஒரு ஸ்க்ரீன் லோகோ பைலட்டிற்குத் தொடர்ந்து காட்டுகிறது.

பாதுகாப்பான செயல்பாட்டை உறுதி செய்வதற்காகப் பரிசோதனை மற்றும் பராமரிப்புக்கான கால அட்டவணைகள் வகுக்கப்பட்டுள்ளன.

இத்திட்டத்தை எதிர்ப்பதாகத் தெரிவித்துள்ள INLD தலைவர், இதன் வாழ்நாள் கால ஆற்றல் செலவுகள் குறித்து ஒரு சுதந்திரமான தணிக்கை நடத்தப்பட வேண்டும் என்று வலியுறுத்தியதுடன், மாநிலத்தின் அனைத்து அரசியல் மற்றும் பொதுத் தளங்களிலும் இது ஒரு 'உயர் தொழில்நுட்பக் கொள்ளை' என்றும் வர்ணித்துள்ளார்.