சீன வெளியுறவு அறிக்கை...

கிழக்கு லடாக் எல்லை பகுதியில் இந்திய-சீன படையினருக்கு இடையே பதற்றம் நீடிக்கிறது. இந்நிலையில், மாஸ்கோவில் இந்திய-சீன வெளியுறவு அமைச்சர்கள் சந்திப்பு நடைபெற்றது. இதில், லடாக் எல்லையில் பதற்றத்தை தணிக்கை சீன வெளியுறவு துறை 5 அம்சத் திட்டத்தை வகுத்திருப்பதாக தகவல் தெரிவித்துள்ளது.

இந்தியாவின் கல்வான் பள்ளத்தாக்கு பகுதியை கடந்த ஜூன் 15-ம் தேதி சீன துருப்புகள் ஆக்கிரமிக்க, இந்திய ராணுவத்தினர்மீது பயங்கர ஆயுதங்களுடன் தாக்குதல் நடத்தியது. இதில் 20 இந்திய வீரர்கள் வீரமரணம் அடைந்தனர். இதைத் தொடர்ந்து, எல்லையில் நிலைமை மோசமாகி பதற்றம் நீடித்தது.

இதைத் தொடர்ந்து, கடந்த 4-ம் தேதி ரஷ்ய தலைநகர் மாஸ்கோவில் ஷாங்காய் ஒத்துழைப்பு அமைப்பின் ராணுவ அமைச்சர்கள் கூட்டம் நடைபெற்றது. இதில் சீன ராணுவ அமைச்சர் வெய் பெங்கியை இந்திய ராணுவ அமைச்சர் ராஜ்நாத்சிங் சந்தித்து பேசினார். அப்போது ‘சீன துருப்புகள் ஒருதலைபட்சமாக, அசல் கட்டுப்பாட்டு கோட்டுடனான நிலைமையை மாற்ற முயற்சிக்கும் செயல், இருதரப்பு ஒப்பந்தங்களை மீறுவதாகும்’ என ராஜ்நாத்சிங் கூறியிருக்கிறார்.

இதற்கிடையே கடந்த 7-ம் தேதி இரவு லடாக்கில் அசல் கட்டுப்பாட்டு கோடு பகுதியில், இந்திய நிலைகளில் ஒன்றை பயங்கர ஆயுதங்களுடன் சீன துருப்புகள் அத்துமீறி முன்னேறியது. பின்னர் அங்கு துப்பாக்கிச்சூடு நடத்திவிட்டு, இந்திய தரப்பினர் மீது பழி போட்டது. இதனால் லடாக் எல்லையில் இரு தரப்பு படைகளும் குவிந்திருப்பதால், தொடர்ந்து பதற்ற சூழ்நிலை நிலவுகிறது.

இந்நிலையில், மாஸ்கோவில் கடந்த 10-ம் தேதி நடந்த ஷாங்காய் ஒத்துழைப்பு அமைப்பின் வெளியுறவு அமைச்சர்கள் கூட்டத்தில், இந்திய வெளியுறவு துறை அமைச்சர் ஜெய்சங்கர் பங்கேற்றார். பின்னர் ரஷ்யா, இந்தியா, சீனா ஆகிய நாடுகளின் கூட்டமைப்பான ‘ரிக்’ அமைப்பின் வெளியுறவு அமைச்சர்களின் கூட்டம் நடைபெற்றது. இக்கூட்டத்தை ரஷ்ய வெளியுறவு அமைச்சர் செர்கெய் லாவ்ரோவ் நடத்தினார். இதில், இந்திய வெளியுறவு அமைச்சர் ஜெய்சங்கர் நேருக்கு நேர் சீன வெளியுறவு அமைச்சர் வாங் யியை சந்தித்து பேசினார். இதில் இருதரப்பிலும் சுமூக பேச்சுவார்த்தை நடைபெற்றதாக கூறப்படுகிறது. பின்னர் தனது ட்விட்டர் பக்கத்தில், ‘மாஸ்கோவில் ரஷ்ய வெளியுறவு அமைச்சர் செர்கெய் லாவ்ரோவ் நடத்திய ரிக் வெளியுறவு அமைச்சர்கள் கூட்டத்தில் பங்கேற்றேன். வரும் ஆண்டில் ‘ரிக்’ செயல்முறையின் தலைமை பொறுப்பை இந்தியா ஏற்கிறது’ என ஜெய்சங்கர் குறிப்பிட்டுள்ளார்.

இந்நிலையில், நேற்று (11-ம் தேதி) ‘இந்தியாவுடன் ராஜதந்திர மற்றும் ராணுவ மட்டத்திலான பேச்சுவார்த்தை நடத்த சீன அரசு விரும்புகிறது. அப்போதுதான் சர்ச்சைக்குரிய எல்லை பகுதியில் அமைதியை மீட்க முடியும். தற்போதைய எல்லை நிலைமை இரு நாடுகளின் நலனுக்கும் சரியானதாக இல்லை. சமாதானத்தை உறுதி செய்யவும், அசம்பாவிதங்களை தவிர்க்கவும் தற்போதைய ஒப்பந்தங்களுக்கு கட்டுப்பட வேண்டும். இன்றைய நிலையில், இரு நாடுகளும் 5 அம்ச திட்டத்தை வகுத்துள்ளன’ என சீன வெளியுறவு அமைச்சகம் அறிக்கை வெளியிட்டுள்ளது.

அதென்ன… 5 அம்ச திட்டம்..?

1. இந்திய-சீன உறவை மேம்படுத்தும் வகையில், இருநாட்டு தலைவர்களுக்கு இடையே செய்thu கொண்ட ஒப்பந்தங்களை பின்பற்றி நடக்க வேண்டும். பிரச்னைக்குரிய எந்தவொரு விஷயத்தையும் இனி அனுமதிக்கக்கூடாது.

2. எல்லையில் நிலவும் பதற்றமான சூழல், இரு நாடுகளுக்கும் நல்லதல்ல. இருநாட்டு ராணுவ அதிகாரிகளும் பேச்சுவார்த்தை மூலம், தங்களது பிரச்னைகளை தீர்த்துக் கொள்ள வேண்டும். விரைவாக படைகளை பின்வாங்கிக் கொள்ள வேண்டும். இரு படைகளுக்கும் இடையே குறிப்பிட்ட இடைவெளியை உறுதிப்படுத்த வேண்டும். எல்லை பதற்றத்தை தணிக்க வேண்டும்.

3. இந்திய-சீன எல்லை விவகாரம் தொடர்பாக ஏற்கெனவே உள்ள ஒப்பந்தங்கள், நெறிமுறைகளை பின்பற்றி நடப்போம். எந்தவொரு விவகாரமும் மீண்டும் சிக்கலை ஏற்படுத்தாதவாறு பார்த்துக் கொள்ள வேண்டும்.

4. இருதரப்புக்கும் இடையில் பேச்சுவார்த்தை, தகவல் தொடர்பு ஆகியவை சிறப்பு பிரதிநிதித்துவ வழிமுறைகளின்படி மேற்கொள்ளப்படும். எல்லை விவகாரம் தொடர்பாக, அடுத்தடுத்த பேச்சுவார்த்தைகளுக்கு உடனடியாக ஏற்பாடு செய்யப்படும்.

5. எல்லையில் நிலவரத்தை கட்டுக்குள் கொண்டு வந்து, புதிய நம்பிக்கையை விதைத்து, அமைதியை நிலைநாட்டவும், உறுதிப்படுத்தவும் வேண்டும் என குறிப்பிட்டுள்ளது.

உச்சகட்டமாக, இந்திய எல்லையை ஒட்டியுள்ள பாங்காங் ஏரிப்பகுதியை சுற்றியுள்ள மலைத்தொடர்களில் இரு நாடுகளும் ராணுவ நிலைகளை அமைத்துள்ளன. இந்த ஏரியை சுற்றி பிங்கர் 1 முதல் 14 வரை பல்வேறு நிலைகள் உள்ளன. ஏரியின் தெற்கு கரையோரத்தில் சீனாவின் பிங்கர் 4 நிலை அமைந்துள்ளது. கடந்த ஏப்ரல், மே மாதங்களில் இங்கு சீனப் படையினர் அத்துமீறி நுழைந்தனர்.

இந்நிலையில், பிங்கர் 4 பகுதியில் சீனப் படையினர் ஆக்கிரமித்த மலைத்தொடரைவிட மிக உயரமான மலைத்தொடரை இந்திய ராணுவம் கைப்பற்றியுள்ளது. இந்தியா கைப்பற்றிய மலைத்தொடர், சீன ராணுவ நிலைகளுக்கு மிக அருகே, மிக உயரமாகவும் உள்ளது. இந்த நடவடிக்கை கடந்த மாத இறுதியில் துவங்கியது. தற்போது பிங்கர் 4 பகுதியின் மிக உயரமான மலைத்தொடர், இந்தியாவின் கட்டுப்பாட்டில் வந்துள்ளதாக தெரிவிக்கப்பட்டு உள்ளது.

கடந்த சில நாட்களுக்கு முன் பாங்காங் ஏரியின் தெற்கு கரையோரம் அமைந்துள்ள முக்கிய நிலைகளை சீன ராணுவம் கைப்பற்ற முயற்சித்தது. அதை இந்திய வீரர்கள் வெற்றிகரமாக முறியடித்தனர் என்பதும் குறிப்பிடத்தக்கது.