உயிர் நீப்பர் மானம் வரின்

தாயகத்தைப் பழித்துரைத்தால்
வாய்மூடிப் பொறுத்திருக்கும்
இழிவு அந்தத் தமிழனுக்கு
இயல்பல்ல என்பதனால்

விளைவெதற்கும் அஞ்சாமல்
வித்தகன் தன் வாய்த்திறமும்
ஒறுத்திடு மெழுத்தாலும்
கறுத்த மனத்தானை

மண்டியிடச் செய்தமையைக்
கண்டிருந்த நாஜியர்கள் மிகச்
சினந்து குள்ள நரிகளென
மனதுக்குள் திட்டமிட்டு

விழா ஒன்றுக்கு அழைத்து
விருந்துணவில் விடம்
கலந்துக் கயமை வழி
கண்டார் மெல்லவே

கொன்றிடவே வழி செய்து
கீழ்மையே குலவியல்பாய்
காட்டி விட்டார் உலகினுக்கு
காலம் அவர்களுக்குப்

பின்னாளில் பேரிழிவைப்
பேரழிவைத் தந்து பெரும்
உலகப்போரினிலே வீழக்
கலக்கமுற்று கோடிகளாய்

மக்களினம் கொன்றழித்த
மன்னிக்க முடியாத ஈனங்கள்
பல புரிந்த நாடெனவே
பலமிழந்து புகழிழந்து

நாடிரண்டாய்ப் பிரிந்து
நலம் கெட்ட வரலாறு
நாமறிவோம்.

திடம் கொண்ட தமிழ் வீரம்
விடம் கொண்டு நோதலுற்ற
உடல் தந்த துன்பத்தால்
துவண்ட கதை தொடர்ந்து
உரைப்பேன்.

****

பழி தீர்க்க எண்ணி அந்த
இழி குலத்தோர் தந்த
நஞ்சு, உள்ளிருந்துழற்றி
அஞ்சிடும் நிலை தரவே

மனைவியுடன் இத்தாலியில்
மருத்துவம் காணச்சென்றான்.
ஓரளவு நலம் பெற்று வீடு
சேரவென பர்லினுக்கு

வந்தவர்கள் நடுக்குறவே,
சொந்தமெனக் கொண்ட
வீடு சிதைந்து சீரழிந்து
தேடிச் சேர்த்த பொருள்

சிதற அழித்து வாழுமிடமின்றி
பதறி நிற்கப் பகைக்கூட்டம்
செய்திட்ட கொடுமை கண்டு
சோர்ந்து வழியேதுமின்றி அங்கு நாட்களெண்ணித்

தங்கித் துயர் தாங்கி நிற்க
அந்த ஒருநாள் துயராக
வந்து விடிந்ததுவே.

அந்த ஒரு நாள் பாரதமும்
பைந்தமிழர் நற்குலமும்
பேரிழப்பை பேரிடரைப்
பெருந்துயரைத் தாங்கும்
நாளாக வந்து விளைந்ததுவே.